Pieter Willems
Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Pieter Willems woort gebore op 6 Jannewarie 1840 in Mestreech, en is gestorreve op 23 Fibberwarie 1898 in Leuve, Belsj. Zien awwers waore Johannes Thomas Willems, gebore op 22 November 1802 in Mestreech en is gestorreve op 25 Oktober 1848 in Mestreech, en waor getrouwd mèt Catharina Josephina Meessen, gebore op 18 Oktober 1813 in Mestreech en is gestorreve in Mestreech op 15 Oktober 1880. De femilie woende in 't klein aajt wachhuiske Pieter-Poort, gelege op de Pieterstraot, nommer 35. Op 11 Juli 1832 trouwde Johannes Thomas Willems mèt de èlf jaor jongere Catharina Josephina Meessen oet Mestreech, en twie maond later woord 't ierste keend Marie Willems gebore. Oet de ech vaan Johannes en Catharina woorte 7 kinder gebore; 1.Marie Willems, gebore in September 1832, en is gestorreve ? 2.Josef Willems. Gebore in 1834, en is gestorreve ? 3.Barbara Willems. Gebore in 1836, en is gestorreve ? 4. Petrus Casparus Hubertus (Pieter) Willems woort gebore in Mestreech op 6 Jannewarie 1840, en is gestorreve op 23 Fibberwarie 1898 in Leuven Belsj. 5.Dochter in 1842, en is gestorreve ? 6.Dochter in 1844, en is gestorreve ? 7.Dochter in 1847, en is gestorreve ? Johannes Thomas Willems begós zien laop-baon bij ziene pa, Henricus Lambertus Willems es belastings ambteneer bij Gemeinte Mestreech, en vaanaof 1824 bij de Provincie Limburg, op de administratie. Later woord heer bevorderd tot de rang vaan “Commies Twiede Klas”. Es veerde keend woort Petrus Casparus Hubertus (Pieter) Willems gebore, en wel op 6 Jannewarie 1840 en is gestorreve op 23 Fibberwarie 1898 in Leuven Belsj. Wie Pieter 8 jaor waor storf ziene pa, en waor Pieter veurbestump um zien ma, die wedevrouw waor, neet lang tot las te zien, en um zoe snel wie meugelek ziene eigenste weeg te goon. Meh dat góng neet wie ze gedach hadde, umtot Pieter bezunder good kós liere. Op de liegere sjaol waor heer ummertouw de bèste vaan de klas. Nao de liegere sjaol woort heer al op 11 jaorege leeftied oetgenudeg um nao 't Atheneum vaan Mestreech te goon. Dee sjaol stóng toen hoeg in aonzeen in Mestreech en Pieter Willems waor ein vaan de zès lierlinge die in d'n ierste klas aofdeiling vaan de sjaol, de Latien-Griekse aofdeiling, woort touwgelaote zoonder sjaolgeld te hove betaole. Pieter Willems waor in die zès jaor op 't Mestreechs Atheneum 'n Primus Perpetuus, en studeerde dao Summa Cum laude aof. Bij de sjaol proclamatie vaan 30 Juli 1857, woort aon haom de hoegste oondersjeiing, naomelek de “Rozenkroon“ oetgereik door de Provincie Gouverneur vaan Limburg, Theodoor de t 'Serclaes de Wommersom.
Nao zien studie aon 't Atheneum vertrok heer in 1857 nao Leiden, boe heer Weisbegeerte en Klassieke Filologie (klassieke taolkunde) góng studere. Naotot heer in 1861 dao mèt bezunder hoeg ciefers zien dokters-titel behaold had, kraog heer de meugelekheid um wijer te studere, naomelek in Leiden, Paries, en Berlien. Nao zien twie-jaorege studie-reis góng heer in de zomer vaan 1863 weer veur e paar maond trök nao zien awwelek hoes in Mestreech. Meh al gaw kraog heer 't verzeuk um nao Leuve te kómme, um dao aon de Universiteit 't docent-sjap vaan de Letterenfaculteit op ziech te numme. Vaanaof 1864 waor heer docent in Leuve aon de Universiteit mèt es hoof-vakke Latijnse Letterkunde en Romijnse Oudheden, en 't zouw de start zien vaan 'n oetzunderleke academische carrière. In dat zelfde jaor naom heer de Belzje nasjenaliteit  aon, en woort in 1871 aongestèld es Hoeglieraar vaan de Letterenfaculteit. Pieter Willems trouwde in Leuven op 26 September 1867 mèt Marie Valentine Clémence Henot, gebore op 26 December 1845 in Leuven, en is gestorreve in Weert-Saint-Georges op 29 November 1907. Zie waor de jongste dochter vaan Philippe Henot de Laddersous, rechter bij de “Rechtbank van Eerste Aanleg in Leuven, en lid vaan 't Schepencollege vaan Leuven, gebore op 23 Fibberwarie 1797 in Leuven, en is gestorreve op 8 Miert 1871 in Leuven. De sjoenmam vaan Pieter Willems, Jeanne Cécile van Elewijck, gebore op 27 December 1799 in Leuven, en is gestorreve op 2 Miert 1846 in Leuven, waor vaan 'n rieke komaof vaan 'n Leuvense femilie. De femilie vaan zien sjoen-awwers hadde nen' aontal manne hoege functies in de Belzje magistratuur en in 't Belzje leger. 't Jong koppel Marie Valentine en Pieter góng woene aon 't Sint-Jacobsplein nommer 22 in Leuven. Oet de ech vaan Marie Valentine en Pieter woorte 9 kinder gebore; 1.Cécile Philippine Marie Joséphine Hubertine Willems Henot De Laddersous, woort gebore in Leuven op 25 Augustus 1868, en is gestorreve in Luik op 24 November 1952. 2.Charles Léon Ghislain Hubert Marie Joseph Willems Henot De Laddersous, woort gebore in Leuven op 20 November 1869, en is gestorreve in 1946. 3.Joseph Pierre Marie Willems Henot de Laddersous, woort gebore op 29 Juli 1871 in Leuven, en is gestorreve op 12 Mei 1944 in Luik. 4.Maria Emilie Odonie Colette Ghislaine Huberti Willems Henot De Laddersous, woort gebore op 20 Miert 1874 in Woluwe-Saint-Lambert, Brussel, en is gestorreve op 13 Jannewarie 1951 in Braives, Luik. 5.Jean Victor Ghislain Hubert Marie Joseph Willems Henot de Laddersous, woort gebore op 10 Oktober 1876 in Leuven, en is gestorreve in 1920. 6.Valentine Maria Albertine Hubertine Joséphine Willems Henot de Laddersous, woort gebore op 30 December 1879 in Leuven, en is gestorreve op ? 7.Clémence Mathilde Frédérica Hubertine Marie Willems Henot De Laddersous, woort gebore op 11 November 1881 in Leuven, en is gestorreve in Brussel op 16 December 1952. 8.Caroline Cécile Françoise Hubertine Marie Willems Henot De Laddersous, woort gebore op 2 Aprèl 1883 in Leuven, en is gestorreve ? 9.Julie Joséphine Jeanne Marie Hubertine Ghisla Willems Henot De Laddersous, woort gebore op 5 December 1885 in Woluwe-Saint-Lambert, Brussel, en is gestorreve in Le Caire (Égypte) op ? Naotot 't veerde kind woort gebore in 1874, verhuisde de femilie nao 't groet awwerlek hiere-hoes vaan Marie Valentine, gelege aon de Brusselsestraat in Leuven, dat tot 1871 nog bewoend waor door häöre Pa en zien twie dochters. De Sint Jacobs-kerk waor de parochie kerk vaan Pieter en laog aon den' euverkant vaan hun nui hoes.
In 't jaor 1864 begint Pieter Willems op 24 jaorege leeftied es docent aon de Letteren-Faculteit in Leuven. E paar jaor later woort heer Hoeglieraar veur 't vak vaan Romeinse Oudheden, dat heer tot aon zien doed zouw blieve doen. Vaanaof 1872 volgde heer Professor Jaer op es secretaris vaan de Universieteit, es rechter hand vaan de Rector. Ouch dees functie bleef heer vervölle tot aon zien euverlije, en waor oonder veer opein volgende Rectore de constanste bestuursfactor in 't Rectoraat vaan de Leuvense Universiteit. In 1870 versjeen d'n ierste editie vaan Pieter Willems handbook; “Le droit public romain de puis l'orgine de Rome jusqu á Constatin le Grand”. Tijdens 't leve vaan Pieter Willems kinde dees internationaol gerenommeerde studie vijf her-drökke vaan 't book zoe wie in 1873,1874, 1880, 1883, en 1888. In 1910 versjeen nog 'n lètste posthume her-oetgaof, bezörg door de zoon vaan Pieter, Joseph Pierre Marie Willems, dee Professor Romeins Rech aon de Universiteit vaan Luik waor. Le Droit Public Romain, kraog väöl lof in 'n groet aontal len en versjeen oonder aandere in 'n Russische en Servische vertaoling. In 1878-1880 publiceerde Pieter Willems zien Magnum Opus; 'n twie deilige studie euver; Le Sénat de la République Romaine. In 1885 bekroende de Belzje Academie voor Wetenschappen dat wèrk mèt de staotspries veur Historische Wetensjappen. 't Jaor daonao op 5 Augustus 1886 moch Pieter Willems 't Iere Doctoraat in de Rechte oonvaange, vaan de Ruprecht- Karls-Universiteit vaan Heidelberg, die toen 500 jaor bestoonte. Oondertösse góng ‘t finansieel good mèt de femilie Willems-Henot De Laddersous. Zoe hadde zie in 1880 oonder aandere zès inwoenende hoeshelderse. Pieter koch ouch eigendomme en bouwde dao oonder aandere hoezer op um die te verheure. Neve de stads-woening in Leuve had de femilie ouch nog e boeteverblief in Sint-Joris-Weert, ‘t Biezenhof. Hei trok de perfesser ziech regelmaoteg trök um in de landeleke natuur tösse de Dijk en ‘t Meerdaalwoud te wandele en zoe tot rös te kaome. Wie heer begin 1898 nao ‘n korte krenkde storf, woort Pieter Willems daan ouch dao begraove op ‘t kleine kerkhof vaan de Parochiekèrk vaan Sint-Joris-Weert.
Catharina Josephina Meessen, zien ma. 1813-1880.
Jeanne Cécile van Elewijck 1799-1846 Sjoen-Ma.
Marie Valentine Stephanie Clémence Henot 1845-1907.
 Philippe Henot de Laddersous Sjoenpa 1797-1871.
Petrus Casparus Hubertus (Pieter) Willems 1840-1898.
Dochter Cécile Philippine Marie Joséphine Hubertine Henot Willems De Laddersous, 1868-1952.
Dochter Clémence Mathilde Frédérica Hubertine Marie Henot Willems De Laddersous, 1881-1952.
Dochter Maria Emilie Odonie Colette Ghislaine Huberti Henot Willems De Laddersous, 1874-1951.
Zoon Joseph Pierre Marie Henot Willems De Laddersous, 1871-1944.
Woenhoes Fam.Willems Brusselsestraat 190 Leuven.
Geboortehoes Pieter Willems. Pieterstraot 35.
Boeteverblief Biezenhof in Sint-Joris-Weert.
Puntelies Pieter Willems Koninklijk Atheneum Maastricht.
Atheneum Mestreech gelege neve de Dominicane kerk.
Theodor Stille. 1869-1925.
Cahier mèt 4.200 vertaol-wäörd.
Wie Pieter Willems 45 jaor gewoorde waor voond heer eindelek de tied um gèt te goon doen wat heer ummertouw had wèlle goon doen. In 1884 begós heer mèt 't preparere vaan sjaol sjrifte, door dao stroke in te plakke mèt 4.200 “Algemeen Nederlandse “ wäörd. Veerhoonderd cahiers had heer zoe klaor gemaak um die in de jaore 1885-1886 te sjikke nao dialek sprekers. Dat waor d'n aonvaank vaan 'nen ierste groet-sjaolige dialek enquête vaan de Zuideleke Nederlande en aongrenzende regio's, 't gebeed boe me historisch gesproke 'n Frankisch dialek spraok. Pieter Willems vroog um neve 't  Algemeen Nederlands, hun dialek wäörd te sjrieve, en de cahiers weer nao haom trök te sjikke. Me mós in totaal oongeveer 15.000 dialek vörme opsjrieve, um zoe de enquête gaans in te völle. Ouch heet Pieter Willems en zien informant Theodor Stille Mestreechter wäörd in de enquête kinne verwerke. Spieteg genóg kaome d'r mer oongeveer 350 ingevölde cahiers trök. Evels zie vörmde tot op d'n daag vaan noe de belaankriekste Historische bron veur besjrievend of vergeliekend dialek oonderzeuk in Vlaandere en Zuid-Nederland. Nao 't euverlije vaan Pieter Willems in 1898 woorte de enquête-cahiers en de samevattinge vaan häöm boe heer e paar jaor mèt bezig is gewees, door zien vrouw en kinder bewaord. De collectie woort in 1909 door ziene zoon Paul Willems de Laddersous gesjoonke aon de “Koninklijke Academie voor Nederlandse Taal en Letterkunde” in Gent. Dao weure ze nog ummertouw bewaord. Nen'Aontal jaore geleie digitaliseerde de Academie de ganse collectie en zat 't werk vaan Pieter Willems online. Http:11ctb:kantl.be/corpus/Pieter Willems heet 'n bezunder groete veurtrekkersrol gespäöld in de gesjiedenis vaan de dialectologie in Belsj en Nederland. Heer storf op 23 Fibberwarie 1898 in Leuven Belsj op 58 jaorege leeftied.
Petrus Casparus Hubertus (Pieter) Willems
1840-1898.