Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Veldeke Cabberèt
Mèt de Vastelaovend versjijnt al jaore laank 'ne Vastelaovends-gezét. Dee gezèt,”De Kengkee”, weurt oetgebrach door de Maospos. In dee Vastelaovends-gezèt woorte en weure lui mèt of zoonder polletieke achtergroond, getoek, dèks de ketel gesjoord, en wel op 'ne meneer dee allein mèt de Vastelaovend kin. Bekinde Mestreechtenere make mèt tekste en teikeninge dao daan ein gehiel vaan. 't  Is 'ne Vastelaovends-gezèt, dee neet mie is weg te dinke en sterk verboonde is mèt de Mestreechter Vastelaovend. Mèt 't make vaan De Kenkee, wèrke 'nen aontal Mestreechtenere mèt, die ouch 'ne cabberèt en of ne muzikaole achtergroond höbbe.  Ein vaan die mètwèrkers is Phil Dumoulin. 't Waor Thei Bovens z.g. dee häöm euverhaolde um mètwèrking te verliene aon 't make vaan De Kengkee. Phil Dumoulin haolde op zien bäört e paar jaor daonao Els Ottenheym-van Schijndel, Toon Jennekens en Wil Wintjens debij. In de jaore 90 kraogen de prizzentaties vaan De Kengkee ummertouw 'ne cabberèt achtige uterlek, en de stap waor daan ouch neet groet, tot 't opriechte vaan 'ne Vastelaovends Cabberèt gróp. Me hoofde in dat jaor 2001 neet lang nao te dinke, um 'ne gesjikde naom te vinde veur dee nuie Mestreechtse cabberèt gróp.  't Veldeke Vastelaovends -Cabberèt waor gebore !!  Els Ottenheym, Wil Wintjes, Hortense Brounts, Gwen Tomassen, Inge Pieters, Twajn Weijenberg, Jan Janssen en Phil Dumoulin waore den ' ierste leien vaan 't Veldeke Vastelaovends Cabberèt. De muzikaole begeleiding en umliesting woort ouch vaan 't begin af aon verzörgd door 't combo vaan Ben Perry. 't Combo vaan Ben Perry  besteit  wijer oet, Frans van Vliet en John Westenberg. In 2003 kaom dao ouch nog Roger Weijenberg, op de gitaar, debei. Jan Janssen vertrok oet de gróp in 2005 en veer jaor later in 2009, Gwen Tomassen en Inge Pieters. In  plaots daovaan koum Elly Theunissen dao veur trök. Den ' ierste veurstèliing, in 't jaor 2001 voond plaots oppe  Fort Sint Pieter. Meh al gaw waor Fort Sint Pieter te klein umtot de belangstèlling vaan 't begin af aon bezunder groet waor. Me mós daan ouch op zeuk goon nao 'nen aandere zaol. De käös veel al gaw op de Bonbonnière, e aajd tejater, meh ouch e tejater mèt väöl historie en oetstraoling. 
Dat waor 'nen annaos oet 't jaor 2009. 't Jaor daonao waor den annaos " Jeh Neet Daan ? " 't Veldeke Vastelaovends Cabberèt is al jaore e groet suksès en de lui  höbbe 't  d’r veur euver um ore in de rij te goon stoon um e keertsje te kinne koupe veur ne veur stèlling vaan 't Cabberèt.  't Veldeke Vastelaovends Cabberèt is op dit momint ein vaan de bekinste activiteite vaan de Veldeke Krink Mestreech. Dit evenemint is ouch veur neet Veldeke leie touwgaankelek. Veldeke leie kriege korting op kaarte en daobij weure ze ouch in staot gestèld um e paar weke veur d'n officiële kaartverkoup die al te kinne koupe. De vraog nao kaarte is nog ummertouw bezunder groet en eder jaor zien  7 of 8 oetveuringe in e paar oor oetverkoch. Tot de lui content zien bliek ouch oet de reacties vaan: zoenen aovend is de bèste medicijn, en verleie jaor waor geweldig, meh dit jaor waor nog beter.!  Rizzumme kin me stèlle tot 't Veldeke Vastelaovends Cabberèt neet mie  weg te dinke is oet de callepin vaan meinig Mestreechter Vastelaovends vierder of leefhöbber vaan Mestreechter Cabberèt ! 
Phil Dumoulin.
‘t Veldeke Cabberèt 2012.
Jan Janssen.
Will Wintjens. 2018.
‘t Veldeke Cabberèt 2017.
Veur de zevende kier prizzenteerd 't Vedeke Vastelaovends Cabberèt e nui program mèt de titel   " ' t  Kump Good " .  Stoon eur aondeile lieg, höb geer altied pech, las vaan de recessie,  verliert geer mèt sporte umtot de kneje neet mie wèlle of sjaggerneert geer uuch aon alderlei lui en zake in Mestreech ?   Daan weurt 't tied tot geer weer ins 'ne kier al die zörg en de tegesleeg vergèt !! De speulers vaan ' t Veldeke Vastelaovend Cabberèt hawwe uuch veur tot, wat ouch gebäört, 't weer good kump ! In 't Mestreechs, dat versteit ziech !  Mèt Carnavaleske humor, milde ironie en rake satire bringe Hortense Brounts, Els Ottenheym, Gwennie Thiessens, Inge Pieters, Phil Dumoulin, Twajn Weijenberg en Wil Wintjes in 'nen aovendvöllend program  e bezunder en plezerige aovend veur mennèg Mestreechteneer.  Jeh neet daan ?          2009.
‘t Veldeke Cabberèt
                                                                                    Veur de Zeventiende kier !! Wie 't Veldeke Vastelaovends Cabberèt in 2017 veur ‘t 17e jaor achterein had opgetrejd, waor 't zoe wie eder jaon weer e groed suksès. De zaol kós oonder aandere geneten vaan Mister Goodbye, dee lui die 't neet mie zaoge zitte, nao 'nen aandere wereld kós helpe. Boe de riggelère hölp verliening te kort sjoot, kump Mister Goodbye in actie evels wel mèt 'n vergeujing, desnoets mèt 'n hamer. Ouch de parodie op Fabrizio(mèt Twajn Weijenberg in de hoofrol) mèt 't nummer “Knipperleech”, kraog väöl applaus en de lachers op de hand. En ouch Will Wintjens mèt zien prachtige luuster-leedsjes, meh ouch 't verhaol vaan 'n vluchteling dee mèt zien tentsje oppe Vriethof tijdens de Vastelaovend is verzeild geraak. Weijer waor nog 'ne Mestreechter verzie vaan “De slimste mens”, boe e koppel na jaore getrouwd te zien, ziech niks mie te zègke hadde; meh toch nog vief minute awhoorde mèt de groetste oonzin. Bij de traditionele aofsleting vaan de “Hangplek”, kós de kraanke Phil Dumolin, neet mèt doen, meh 't bestuur vaan Veldeke losde dat op um een paar fleskes beer miejer op de buun te zètte. Al mèt al vertuund 't Veldeke Cabberèt nog altied gein teike vaan vermeujdheid of gebrek aon inspiratie, en dat maag nao zoeväöl jaore 'ne groete prestatie weure genump. 't Veldeke Cabberèt maak nog ummertouw gein gebruuk vaan special effects en groete decors-wisselinge. 't Is veural e luuster-cabberèt mèt dèks neet miejer es 'n taofel en gèt steul op de buun. 'n Doordachte einvoud, boebij 'n neet te oondersjatte rol is weg gelag veur 't muzikaol combo vaan Ben Perry, Frans van Vliet, en John Westenberg. 't Dreital drejt neet hun hand um veur 'ne Fabritio- parodie, meh ouch neet veur 'ne Kuns en Kitch-tune, of e gospel of 'ne Franse chason. 't Zien evels de leedsjes oet de aw does vaan,  Vastelaovend in Mestreech (1946), tot en mèt Hawwe zoe (1976) die vaanaof d'n ierste menuut veur de sfeer in de zaol zörge. De leedsjes weure wäörd veur wäörd door 't pebliek mèt gezonge, en geve daan de kemedie speulers de tied um tösse de sketches vaan kleier en pruuke te wissele. Die sketches zien uters vermakelik, en dat weurt ouch mèt e stökske zwarte humor gedoon. Op nao de 18e veurstelling ! Zie höbbe neet veur niks gezag, tot zie d’r mèt door goon tot ze d’r bij neervalle !!
‘t Veldeke Cabberèt. 2017.
2019.