Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Börgm.Jean Franscois Hennequin
Börgemeister Mestreech 1819 - 1821
De inein-storting vaan 't imperium vaan Napoleon leide tot groete staotskundige ónzekerigheid en milletaere verwarring. Naotot de Geallieerde Oonderhandelere bij 't congrès in Wene, 't Departement Nedermaas aon Keuning Willem I waor touwgeweze, kaom Mestreech op 1 Augustus 1815 trök aon de Nederlande. In 1815 woort Mestreech hoofstad vaan de nui provincie Limburg en weer oonderdeil vaan 't Keuninkriek. De inwoeners vaan Mestreech reageerde aofwachtend en keul op de nui mach-höbbers. Wat zouwe die Hollenders bringe: oetbuiting, oonderdrökking, bespotting, of vernedering ? Of rös, welvaart en veurspood ? De regering stoond veur 'ne taak um e nui bestuurs-apparaat op te bouwe, zoe wie op Provinciaal, es op plaotselek niveau. D'r woorte ambtenere aongestèld meh ouch lei vaan de Provinciale Staote en Gemeinte Besture woorte vaan bove-aof benump. Daobij had de regering in Den Haag 'ne dudeleke veurkäör veur invloodrieke functies vaan Protestantse persoene. De nuie Gemeinteraod vaan Mestreech woort samegestèld oet renteneers, juriste en kouplui. Die leie waore zjus wie die vaan-oet de Franse tied vaan de zèlfde komaof.
Jean Francois Hennequin woort gebore op 19 Oktober 1772 in Wassigny Departement Ardennes in Fraankriek, en is gestorreve op 28 Oktober 1846 in Gingelom, e dörp vlaak-bij Sint Truiden - Belsj. Heer waor 'ne zoon vaan Nicolas Thomas Hennequin, vaan beroop landbouwer, en Jeanne Marguerie Landragin. Heer studeerde rechte in Paries meh stopde daomèt, en góng op 17 Augustus 1792 es vrijwèlleger in deens bij 't Franse leger, es dragonder bij 'n Cavalerie-Regimint. Wie heer in 1796 't leger weer verleet waor heer kapitein. Heer woort toen Commissaire du Directoire Exécutif Kloosterrade in Rolducin. Heer woort dao populair umtot heer ziech verzat tege de hoege belastinge en woort daonao in 1796 chef de Bureau vaan den Rijksontvanger in Mestreech - Nedermaas. Op 4 Mei 1799 woort Hennequin gekoze tot lid vaan de centrale administratie vaan 't Departemint Meuse Inférieure, en op 26 April 1800 woort heer dat in 't Departemint Conseiller de Préfecture. De kins dat noe vergelieke wie eine vaan de Gedeputeerde Staote. In 1802 trouwde heer mèt e Mestreechse, Cécile Colpin, boevaan häöre pa vaan oet Frankrijk aofkomstig waor. Häör broor waor Surlet, lid vaan de “Sociétées Libérales”, vereiniginge veur bevordering vaan de sjaopekwekerij. Oet de ech vaan Jean Francois Hennequin en Cécile Colpin woort in 1804 ‘ne zoon gebore naomelek, Charles Victor Hennequin. Charles Victor Hennequin trouwde op 7 September 1874 mèt Cécile Magnin.  Later zouw Charles Victor Hennequin bij ‘t euverlije vaan ziene pa Jean Francois Hennequin ‘t kastiel Gingelom erreve.                  Op 11 November 1815 woort Jean Francois Hennequin tot Nederlander genaturaliseerd, meh heer weigerde um Nederlands te spreke. Op 20 Fibbrewarie 1816 woort heer door Keuning Willem I benump tot lid vaan De State vaan de Provincie Limburg . Op 13 Juli 1817 naom heer ziene congé es lid vaan de Gedeputeerde State umtot heer bekans gein Nederlands kós praote en discussiëre .
Twie daog later woort heer wel gekoze tot lid vaan de Twiede Kamer, en in December 1818 woort heer door de Keuning benump tot lid vaan de raod vaan Mestreech. In december 1818 woort heer hij Gemeinte-Raodslid in zien woenplaots Mestreech en op 23 december 1819 ein vaan de drei  Börgemeisters vaan dees stad. 'Ne nuie wèt vaan 27 Fibberwarie 1815 vaan De Nederlande, waor tot de Sjötterije weer in de steij woorte aonbevole, um 't leger dao te oondersteune. De Sjötters mooste ouch edere week oefene en dat beteikende weer 'nen arbeids- daag verluus, en dao had me in Mestreech ( Hennequin en zien 9 Raodslede) geine zin in. Heer meinde umtot Mestreech veur 1794 nog bestuurd woord door Tweeherigheid en de Noordelijke Provinciën, neet 't rech hadde um in 1815 'ne Sjotterij-wèt te make veur Mestreech. Op 10 Miert 1821 woort Hennequin es Börgemeister en zien nege Raodslei aofgezat, en veur 't hoege gerech in Luik gebrach. Heer woort verdeidig door twie advocaote en ouch bij gestoon door ziene vreund, Surlet de Chokier, dee 'ne groet pleidooi veur häöm heel. 't Gevolg hei vaan waor tot zie woorte vrij gesproke op 10 Juli 1821. Jean Francois Hennequin woort op 2 Oktober 1827 weer es raodslid gekoze. Heer bleef raodslid tot 1829 en in dat zelfde jaor woort heer ouch gekoze es lid vaan de Privinciaole Staote.
In 't jaor 1830 tot 1831 woort heer weer tot Börgemeister vaan Mestreech gekoze door 't veurluipeg Belsj bewind. Zoonder praktisch gevolg, umtot de stad in han bleef vaan 't regeringsleger oonder leiding vaan Ginneraol Dibbets. Ouch woort heer verkoze tot lid vaan't Nationaole Congres veur 't Arrondissemint Mestreech. In 't Congres naom heer noets 't woord en naom ouch weer ziene konzee in Aprèl 1831. Einde 1831 woort heer Gouveneur vaan de Belzje Provincie Limburg tot in 1834. Hennequin verhuisde nao Luik, boe heer op 14 juli 1836 es gemeinteraodslid benump woort en op 13 juni 1843 tot Senator verkoze. Heer naom ziene congé op 27 februari 1846. Heer verbleef vaanaof 1839 op ‘t kastiel vaan Gingelom dat heer geërf had vaan zien gooie vreund Surlet de Chokier. Op ‘t ind vaan zien leve naom Jean-François Hennequin stappe um veur ziene vreund e graaf-mónnumintte te laote make. Meh op 5 Juli 1846 woort ‘t verzeuk door de kerkfebrik verworpe. Meh nao de doed vaan ziene pa, deende de zoon vaan Jean Francois Hennequin, Charles Victor Hennequin , ‘t verzeuk opnui in, en dees kier woort op 8 Augustus 1847 de aonvraog good gekäörd.Jean Francois Hennequin  storf in 1839 in Gingelom en woort neve ziene vreund Surlet de Chokier begraove. Heer woort geridderd in 1834 tot Ridder in de Orde vaan Leopold.
Kestiel Gingelom.
Jean Francois Hennequin 1772 - 1846.
Surlet de Chokier 1769-1839.
Graaf monumint vaan Surlet de Chokier 1769-1839.
1772-1846.
Femilie Waope Jean Francois Hennequin