Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Math Niël
Jules, Egidius, Johannes Niël, woort gebore op 29 Aprèl 1875, en is gestorreve op  28 Juli 1957, in Mestreech. Heer waor vaan beroop kappers-patron, en woende op de Spilstraat nommer 15 in Mestreech. Heer trouwde mèt, Maria Hubertina Elisabeth van den Hof, gebore op 24 Mei 1870 in Mestreech, en is gestorreve op 25 Oktober 1907 in Mestreech. Maria van den Hof waor ‘n dochter vaan Cornelis van den Hof en Maria Cornelia Paes. Oet de ech vaan  Jules Niël en Maria Paes woortye drei kinder gebore; 1.Maria, Cornelia, Elisabeth Niël, gebore op 11 September 1900, en is gestorreve op 9 Fibberwarie 1905. 2.Hélène, Hubertina, Julia Niël, gebore 4 November 1901 en is gestorreve op 30 November 1970. 3.Jules, Emile, Marie Niël gebore op 15 Juni 1905 en is gestorreve op 5 September 1995. Op 25 Oktober 1907 is Maria Hubertina Elisabeth Niël-van den Hof gestorreve. Op  10 Augutus 1908 hertrouwde Jules Egidius Johannes Niël, mèt Maria Catharina Hijdendal, gebore op 4 Augustus 1883 in Gulpe, en is gestorreve op 22 Aprèl 1959, en waor ‘n dochter vaan Thomas Hubertus Hijdendael en Maria Helena Maassen. Oet de ech vaan Jules en Maria Catharina, woorte 4 kinder gebore. 1. Math Mathieu Antoine Marie Niël, gebore op  22 Mei 1909, en is gestorreve op 29 November 1970 in Mestreech. 2. Gertrude Catherine Juliette Hélène Niël, gebore op 10 December 1910,(twieling), en is gestorreve op 19 Fibberwarie 1911 in Mestreech. 3. Maria Catherine Juliette Hélène Niël, gebore op 10 December 1910, (twieling), en is gestorreve op 19 Fibberwarie 1911 in Mestreech. 4. Maria Jacoba Helena Niël, gebore op 21 December 1912, en is gestorreve op 30 Aprèl 1996 in Mestreech. Math Mathieu Antoine Marie Niël  greujde op in de binnestad vaan Mestreech en volgde nao de liegere sjaol de handelssjaol. Al vreug späölde heer op ‘ne piano, en ’t doorde neet lang of heer kraog ziene ierste pianolès vaan Franz Kneipp. Franzz Kneip waor ‘ne Duitser dee in deen tied  mezieklès in Mestreech gaof. In ’t jaor 1931 melde Math Niël ziech aon, bij ’t conservatoire Roal in Luik, en góng heer oonder leiding vaan Louis Closs weijer meziek studere. Veer jaor later in 1935 studeerde heer aof en kraog heer de Prix Supérière pries oetgereik.
In ’t begin vaan zien studie opende heer al in de Groete Staat ‘ne piano en meziek winkel. Mèt de höllep vaan zien awwers verkoch heer dao piano’s, meziek instreminte en grammefoonplate. Nao ziene meziek-studie in Luik trejde heer op es solist, en späölde heer oonder aandere salon meziek mèt zien eige trio. ‘Nen aontal jaore daonao, laog bij häöm ’t muzikaole accent gans örgens aanders, en introduceerde heer in Limburg  swingende Jazz-meziek. Same mèt zien opgeriech orkes The Hotplayers, trejde heer op in Mestreech, meh ouch in de provincie en wiet dao boete. In 1940 braok d’n twiede wereld-oorlog oet en Math Niël perbeerde ziech in die oorlogs-jaore staonde te hawwe, mèt ’t musicere en ’t geve vaan mezieklès. Nao tot d’n oorlog in 1945 veurbij waor, lag heer kontacte mèt de Amerikaanse bevrijders. Heer trejde op veur die soldaote en veur de Mestreechtenere oonder aandere in ’t Stadspark. Ouch in de groete dans-zaole vaan Mestreech. Eve later woort  heer pianis,  in ‘t deen tied populaire radio-orkes van Boyd Bachman. Door de samewerking mèt de Amerikane, woort heer ouch geïnspireerd um Amerika te goon bezeuke. In 1948 vertrok heer daan ouch vaanoet Rotterdam nao Amerika. E maond of veer is Math Niël in Amerika gewees, en is dao väöl bekinde jazz musikante tege gekaome boe heer mèt heet same gespäöld. Zoe wie de bekinde, Duke Ellington, Count Basie, Billie Holliday, en Sarah Vaughan. Heer deeg daan ouch väöl inspiratie op dao in Amerika. ‘Nen aontal jaore later in 1956 vierde Math Niel zien zèlver zjubilei es musicus en woort gehöldeg in ‘ne bomvolle Staar zaol, mèt ein aon häöm speciaal opgedrage conzèr. Dat same mèt ’t Cosmopolitain orkes vaan Jos Cleber en ’t Limburgs Symphonie orkes, oonder leiding vaan André Rieu sr. Zie veurde  ‘nen aontal composities vaan Math Niël oet. ’t Hoegtepunt vaan deen aovend waor ‘nen oetveuring vaan de Rhapsody in Blue vaan George Gershwin, mèt Math netuurlek es piano-solis. Math Niël waor es solo-pianis same mèt aandere instrumentaliste dèks te hure op Radio-oetzendinge vaan de Avro, Radio Hilversum, Radio Hasselt, en zier zeker ouch op de Regionale Omroep Zuid, ouch wel ROZ genump. Bij de ROZ waor heer kind aon hoes, en wel daogeleks te hure. Heer trejde ouch dèks op in de betere restaurants, wie Coin des Bons Enfants, Chateau Neercanne, enz. Meh heer waor ouch te hure in de lunchrooms vaan V&D in Heerle en Geleen.
Math-Mathieu-Antoine-Marie Niël.
Math Niël waor Mestreechteneer oonder de Mestreechtenere en dat ute ziech ouch in de competities vaan Mestreechter leedsjes of Vastelaovends-Leedsjes. Heer had es musicus ‘nen internationaole carrière kinne make, meh daan zouw heer Mestreech mote verlaote en dat waor neet aon häöm besteid. Zoonder zien MVV’ke, de Mestreechter Volksmeziek en de Mestreechter Vastelaovend kós heer ‘t neet. Veur MVV, boe heer vaste supporter vaan waor, componeerde heer ’t populaire clupleed, “Jao dat is us MVV ”.  Versjellende Mestreechter Revues en sketches drage ziene musikaole naom. Bekind is ‘t ouch ‘t door de Tempeleers bekroende Vastelaovends-leedsje vaan 1946, “ Karnaval in Mestreech “. Bekind zien ouch zien Vastelaovends-leedsjes vaan, En noe bars de bom, De Sjoeboks vaan Lena, De Kattebak, De Nozem, De Maosboelevaar. Bekinde sjelders, en beeldhouwers zoewie Charles Vos, Giel Serpenti, Pieke Dassen, en Huub Levigne behuurde tot zien vrun. Math Mathieu Antoine Marie Niël  is gestorreve op 29 November 1970 in Mestreech.
Composities Tango Yvonne Midnight Mood Don Egidio Till I Return to You Love me dear Wals Manette Mijnwerkersmars High in the Sky 
Orkesten Arie Malando Metropool Orkest De Zaaiers Cosmopolitain Orkest De Zaaiers Willy Schobben Harmonie Wilhelmina Amsterdamse politiekapel
The Hotplayers.
Vastelaovends Leedsjes. Karnaval in Mestreech En noe bars de bom, De Sjoeboks vaan Lena, De Kattebak, De Nozem, De Maosboelevaar
1875-1957.