Belègk   Mestreech  1793.

Nao 45 jaor vaan rös en vrei in de Nederlandse Republiek, begós 't weer oonrösteg te weure in Europa. Bij de “Eerste Coalitieoorlog” waor d'r 'n militair gesjèl tösse 't revolutionaire Fraankriek en Europese len. De coalitie len tege Fraankriek waore, de Nederlandse Republiek, Groot Britannië, Spanje, Portugal, Napels-Sicilië, Piëmont-Sardinië, en nog aander klein staote. 't Belègk vaan 1793 in Mestreech, waor 'n belegering vaan Franse Revolutionaire legers oonder leiding vaan Ginneraol Francisco De Miranda, um de stad Mestreech te oonderwerpe aon de “Eerste Franse Republiek”, wat evels mislökde. 't Belègk waor vaan Fibberwarie tot begin Miert 1793, tijdens de “Eerste Coalitie oorlog, tösse Fraankriek en aander Europese len, en eindigde op 3 Miert nao de Franse nederlaog in de “Slag bij Aldenhove en mèt 't oontzet vaan Mestreech. Mèt de bestörming vaan de Bastille op 14 Juli 1789 begós de Franse Revolutie. Mèt de Franse Revolutie waor d'r e stroum vaan vlöchtelinge, boevaan de mieste geisteleke en lui vaan adel waore, en boevaan de mieste ziech aonslote bij de “Armée Des Émigrés”. In 1792 bereikde de gróp keunings-gezinde en anti-revolutionaire emigranten haor groetste umvaank in de stad. Oonder hun waore e groet aontal adelleke, 520 geisteleke en vijf bisjoppen, veurnaomelek oet de Noord-Franse departeminte. Um den aondach vaan de binnenlandse trammelant aof te leide, beraomde de “Girondijnen”in Peries 'n boetelandse oorlog: de “Eerste Coalitieoorlog”. (1792-1797). In Juli 1792 trokke de Franse Revolutionaire, same mèt Luikse Revolutionaire de “Zuidelijke Nederlande “binne.  In November van dat jaor voont de beslissende “Slag bij Jemappes” (vief kilometer vaan Bergen provincie Henegouwe Belsj) plaots, en eindigde in 'n euverwinning vaan de Franse Ginneraol Charles-François du Périer-markies  Dumouriez. Daomèt hadde de Franse e deil vaan de “Oosterijkse Nederlanden” en 't “Prinsdom Luik” en “Staats-Brabant” in han. In December 1792 veroverde de Venozolaanse Lutenant-Ginneraol in Franse deens, Francisco de Miranda, de stad Roermond. Door die militaire sucsesse in de “Zuidelijke Nederlande, verklaorde Fraankriek op 1 Fibberwarie 1793 d'n oorlog aon de “Republiek der Verenigde Nederlanden en Ingeland”. D'n aonval op de Hollandse Republiek woort vaanoet twie riechtinge oondernome; 't leger van Ginneraol Charles-François du Périer, markies  Dumouriez zouw langs de kus nao Breda optrekke, oonderwijl Francisco de Miranda langs de Maos zouw optrekke, riechting Mestreech. Op 6 Fibberwarie sloot Francisco de Miranda mèt 15.000 soldaote Mestreech in. Drei weke later had me de laopgraove aongelag, en beghós me mèt e zwoer bombardemint, dat tien daog zouw dore. Mestreech woort verdeideg door 't Staotse Garnizoen oonder leiding vaan Frederik van Hessen-Kassel, Gouverneur vaan Mestreech, en 'n detachemint vaan Franse edele, gevörmp oet e gróp vaan keunings-gezinde vlöchtelinge oonder leiding vaan Ginneraol Jean Thérèse de Beaumont d'Autichamp. Noa de Oostenrijkse euverwinning bij Aldenhoven (bij Aoke) op 1 Miert 1793, woort Francisco de Miranda verras umtot obbins 50.000 Oosteriekers en 20.000 Pruisische soldaote oonder leiding vaan Veldmaarschalk Prins Frederik Jozias van Saksen-Coburg-Saalfeld, bij Mestreech aonkaom. Op 2 Miert gaof Francisco de Miranda 't bevel um 't bombardemint te stake, en 'ne daag later braoke de Franse höl euver tröl 't belègk op. Twie daog later heel de Prins Frederik Jozias van Saksen-Coburg-Saalfeld 'ne triómfanteleke intoch in Mestreech, boenao 'n Te Deum in de Sint Servaos volgde. Door de fel bombardeminte vaan 24 Fibberwarie tot 2 Miert woorte in Mestreech 841 hoezer gehiel of gedeiltelek verweus, zjus ouch wie 'nen aontal kloesters en aander gebouwe. 't Stadhoes woort aon de Luikse kant door 'ne bom getroffe, boebij de sjouw vaan Edmond Plumier, en 't stuukwerk vaan Tomaso Vasalli woorte verweus. Evels de mieste sjaoj woort aongeriech in 't noordwestelijke deil vaan de stad, boe oonder de Commanderij Nieuwen Biesen vaan de “Duitse Orde” in zien gehiel oetbrande. Francisco de Miranda woort zjus ouch wie de Franse Ginneraol, Charles-François du Périer, markies  Dumouriez 'n maond nao 't belègk op gepak op verdinking vaan same-zwering tege de Revolutie, evels woorte zie daovaan later vrij gesproke.Frederik van Hessen-Kassel woort in Mestreech gezeen es de “Redder vaan Mestreech “  en bleef nog een jaor Gouverneur vaan Mestreech. In 1794, nao 't twiede belègk, vertrok heer nao zien kestiel in Rumpenheim in Hessen.

Francisco de Miranda. Ginneraol in ‘t Franse leger. 1750-1816.

Femilie Waope  Francesco De Miranda.

Femilie Waope Frederik van Hessen-Kassel.

 Frederik Jozias van Saksen- Coburg-Saalfeld.Veldmaarschalk in ‘t Nederlandse leger. 1737-1815.

Ginneraol Jean Thérèse Louis de Beaumont, marquis d’Autichamp. Vlöchde in 1793 nao Mestreech. 1738-1831.

Jean Baptiste Bernadotte. Ginneraol in Franse deens. 1770-1837.

Charles François Dumouriez Ginneraol in ‘t Franse leger. 1739-1823.

Francisco de Miranda.Lutenant- Ginneraol in Franse deens 1750-1816.

Frederik van Hessen-Kassel Gouverneur vaan Mestreech. 1747-1837.