Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
 
Brouwerij   De Ridder
De Ridder voont zien oersprunk in Retersbeek, gelege tösse Heerle en Klimme. In 'n pand  gelege aon 't begin vaan dat dörp, woort veur 't iers in 1825 Ridderbeer gebrouwd. Later woort in 1857 't beermerk “De Ridder” verkoch aon de femilie Van Aubel. In 't jaor 1857 stiechde de gebreurs, Louis en Joseph van Aubel in Mestreech, de brouwerij  “ Gebroeders van Aubel Bierbrouwerij ”. Iers in de Rechstraot en later, nao 1900 aon den’ Oeverwal. De naom woort in 1925 gewijzeg in “Brouwerij De Ridder”. Vijf geslachte laank vörmde de femilie van Aubel de directie vaan dees brouwerij. In 1982 kaom de brouwerij De Ridder in han vaan Heineken Nederland. De gebreurs van Aubel hadden in d’n tied vaan umtrint 1857, ouch al brouwerije in Roermond en Meerse. Mestreech had in de 19e iew, mie es 40 brouwerije in de stad, meh dat leep in 1914 al sterk trök tot 24 Brouwerije. Nao d'n twiede wereldoorlog waore ‘t dat d'r nog mer 9, boe vaan oonder aandere twie Kloester-Brouwerije. 't Doorde neet lang of die twie Kloester-Brouwerije stopde ouch demèt, en ouch de Brouwers Eberhard, Th. Grein en Eugène Marres stopde nao d'n Twiede Wereldoorlog. Zoe ouch Brouwerij De Zwarte Ruiter gelege aon de Annalaon, Marres- Ceulen in de Capucijnestraot, en in 1971 in Wiek, Brouwerij De Keizer N.A.Bosch gelege aon de Wieker Grachstraot. Zoe bleef De Ridder brouwerij es einigste nog euver en specializeerde ziech in bere vaan  hoege gisting.
In de jaore 1900 waor de concurrentie groet umtot Mestreech toen nog 26 Brouwerije had. In 1925, nao de umsjakeling op de liege gisting, brach de brouwerij beer op de merret oonder de naom vaan Ridder-Pils. Vijf jaor later in 1930 kraog de brouwerij dezelfde naom, en wel  vaan Brouwerij De Ridder. Me nump aon tot dee naom aofgekaome is vaan Sint Martinus, ridder en petroenheilige vaan de kèrk vaan Wiek, gelege neve de Brouwerij. Ouch is de Ridder trök te vinde op 't beeld-merk vaan Stadsbrouwerij De Ridder. De Ridder waor ouch ein vaan de ierste brouwerije die häör beer exporteerde. De Ridder woort in 1982 euvergenome door 't Heinekens-concern. Op dat momint brouwde De Ridder drei soorte beer. 't Pils vaan van Aubel (vaanaof 1925), 't Oud Bruin, en 'n Maltezer beer. In 't Pilsner beer gebruukde me mer wieneg groof graone en 't had daodoor 'n gooi hop-bitterheid. In 1994 brach me 't beer Vos, um zoe te kinne concurrere mèt 't bekinde Palm beer. 't Waor e amber-kleureg beer vaan 'n hoege gisting, mèt e klein aondeil vaan sokker. In 1987 woort veur ’t iers in jaore weer Bock gebrouwe. Bockbeer is e bezundere beerstijl dee veural in Nederland populair is. Bockbeer heet zien oersprunk in de Duitse stad Einbeck. Bockbeer waor bekaans vaan de kaart verdwene totdat eind jaore zeveteg vaan de veurege iew inins in de belangstèlling kaom te stoon. Allewijl kinne veer tientalle Bockbere zowie vaan bovegistend es oondergistend. Belaankrieke smake in ‘t Bockbeer zien de zeute, werme karameltoene, soms mèt gèt fruitigheid. De aofdronk heet e aard vaan bitterheid. Ouch de aroma’s vaan sjòkkelaat en neute tref ste dèks aon in dat beer. ‘t Alcohol-percentaasj is vaan 6 tot 7.5%.
Jef van Aubel.
    Gebroeders van Aubel Bierbrouwerij.
‘t Jaor daonao in 1988 woort veur ‘t iers de Wieckse Witte gebrouwd, ‘t door Brouw-Meister Wim van Wijk gebrouwe witbeer. ‘t Waor metein e groet suksès, veural in de zomer-maonde umtot ‘t glaas bevrore oet de diepvries kump en zoe ‘t beer lekker fris weurt geserveerd. In snel tempo woort ‘t Mestreechs Witbeer in ‘t ganse land en wiet dao boete bezunder populair. Nao ‘t witbeer vaan Hoegaarde waor de Wiekse Witte ‘t mies verkochte witbeer. Evels umtot de brouwerij um logistieke reie neet boven de 100.000 hl kós greuje, woort ‘t veur de export bestumde deil vaan de Wieckse Witte iers gebrouwe door de paoters Trappiste in Tilburg en later woort de Wieckse Witte door de Heinekendochter Fischer in Schiltigheim -(Vogeze-Fraankriek) gebrouwe. Vaanaof 2002 koum de Wieckse Witte neet mie oet Wyck en steit de brouwerij leeg.Op 1 Miert 2002 stopde de Brouwerij ouch mèt 't brouwe vaan pils, aajt, broen en bokbeer. 't Besluut um te stoppe waor e gevolg vaan oonder aandere 't vermoge um neet miejer beer te kinne brouwe. Ouch umtot me neet kós oetbreie, zoetot de productie beperk bleef tot 100.000 hl. Logistieke probleme waore d'r ouch. Groete vate en fuste móste in Groonsveld op kleinere vrachwagele weure euvergelaoje, umtot die groete vrachwagele neet door de klein straote vaan Mestreech, wie de Oeverwal kóste rije. Daoneve waor de Gemeinte vaan meining um de wiek boe de brouwerij ligk, verkiers-vrij te make. Heineken brach de productie vaan Wieckse Witte, euver vaan Mestreech nao Den Bosch, en 24 maan kraoge toen hunne congé. De Brouwerij is noe e stökske Mestreechse industriële gesjiedenis dat nog is bewaord gebleve. ‘t Mestreechse witbier weurt noe verkoch door Heineken in al hun kaffees, en neet mie wie in ‘t begin allein veur de Ridder kaffees. ‘t Wiekse Witte beer is ‘n zier evenwichteg beer, mèt ‘n oetmuntend bove-ges, net te zeut, neet te gekruid, en ‘t gegeve dat Heineken’n oetstekend distributienet heet, zörge d’r veur tot Wiekse Witte nao Hoegaarden twieds op de Witbeer mèret woort. In 1995 bestóng de productie bij De Ridder oet de helf vaan Wiekse Witte. De brouwerij dat in de jaore daarteg woort gebouwd, waor veur ziene tied uters modern. Dat wiste de Amerikaanse milletaire ouch wie ze Mestreech en Wiek bevrijde op 13 en 14 September 1944. Zie hadde d’n opdracg gekrege um de Brouwerij in han te kriege en ‘t leefs oongesjendeleerd. Dat had niks mèt ‘t beer te make, meh wel mèt de eige waterbron vaan De Ridder, en de moderne bottelarij um flesse mèt water te kinne völle in tied vaan noed. De Amerikane waore bang veur besmet drinkwater die alderhand krenkdes kóste veroerzaakde. Veural de umgeving vaan Aoke waor e reie vaan groete zörg, umtot dee stad neet aon ‘n revier ligk. Al ‘t drinkwater oet dee regio kaom oet e meer dat oetslutend door regewater woort gevöld. Es dat meerke vervould waor de ramp neet te euverzien. Meh ‘t kaom gelökkeg neet zoe wiet, en De Ridder kós goon doen wat zie ‘t bèste kós, weer beer brouwe.