Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Sjeng  Kraft
Sjeng (Jean) Kraft is gebore op 12 December 1924 in Mestreech en is gestorreve op 3 Juli 1999 in Mestreech. Sjeng waor de jongste oet 't gezin Kraft. Sjeng trouwde in 1945 mèt Marie Westenberg, gebore op 20 November 1925 in Mesteech, en is gestorreve op 19 September 2017 in Mestreech. Oet de ech vaan Sjeng Kraft en Marie Westenberg woorte veer kinder gebore, Beppie, Suzy, Maya, en Trudy. Marie en Sjeng gónge woene op de Groete Grach nommer 44, en verhuisde later nao de nuijbouw-wiek Caberg, nao de Peter Gielenstraot. Dao spaolde Sjeng dèks in de zomer in de tuin op ziene accordeon, mèt zaank vaan de femilie en bure. Sjeng Kraft lierde al op jonge leeftied accordeon speule bij zien ierste liermeister Jean Lahaye, en woort gèt later ouch lid vaan de accordeon vereiniging De Endracht. Tot Sjeng väöl talent had, bleek wel tot heer al op zien dertiende jäörege leeftied wereld kampioen accordeon  woort in Parijs (Luik ?) . Later wónt heer nog miejer ierste prijze op concourse in binne en boeteland. 't Waor daan ouch neet verwónderlek tot heer nao de Mezieksjaol in Mestreech góng. Evels bij 't oetbreke vaan de twiede wereld-oorlog kaom dao 'n einde aon, en mós heer zien studie dao aofbreke. In zien mie es veerteg jaor laank meziek-leve sjreef Sjeng doezende leedsjes, tekste, en arrezjeminte veur e groet aontal gróppe, zengers, zengeresse, en muzikante. Sjeng Kraft de muzikaole doezend poet waor belaankriek veur väöl Nederlandse-taolege en instrumintaole hits. Nao 'nen aontal jaore gewerk te höbbe bij Philips- Phonogram, góng heer same mèt Johnny Hoes wèrke bij de nui platemaosjappij Telstar in Weert vaan Johnny Hoes, boe Sjeng orkes leier woort van 't Telstar Orkes.Dao componeerde, en arranzjeerde Sjeng 'ne groet aontal suksèsse aon de laopende band. Bij de opnames in de Telstar studio's leide heer 't studio orkes en späölde dao daan ouch dèks mèt zien accordeon mèt. Zien technisch verfijnde accordeon-speul had 'n eiges stijl, zoetot ste Sjeng zoe dao oet kós prikke. Heer had ouch 'n solo carrière en vörmde oonder aandere e duo mèt Wiel Scheilen, 't Harmonica Duo Jean en Willy, en hadde same hits wie de Echo Wals, in 1980 de Wiener Polka, Skoda Lasky, en de Feswiespolka. Ouch waor heer de spil vaan e studio orkes oonder de naom vaan de Yanko's die ouch 'nen aontal hits hadde wie, De Televisie Polka, Lente Polka, en de Cake Walk Polka. Mèt Wiel Scheilen vörmde Sjeng Kraft ouch e duo oonder de naom vaan Die Limburger. Hun rippertwaar waor veural Polka's, die ze späölde op hun Wiener accordeon. Es drummer späölde mèt hun mèt Huub Jassen oet Den Bosch.
De grammefoon plate woorte mèt väöl suksès verkoch in Europa, meh ouch Amerika waor 'n groete aofnummer. De Wiener accordeon is bekind um zien sjoen depe klaank, en de Helikonbasse klinke es 'n Barriton of Tuba, en boe me sjoen bas-pertijje op kin speule. Die Limburger hadde suksès nommers wie Wiener Polka, Schneewalzer, Festwiespolka, Finkenwalzer enz. Sjeng Kraft waor ouch opname-leier bij Telstar, en maakde mèt 't orkes doezende opnames. Heer begeleide en maakde opnames mèt oonder aandere, de Zangeres Zonder Naam, Johnny Hoes, Leni en Ludwig, Henk Wijngaard, De Electronica's, De Heikrekels, Zwarte Lola, The Walkers en Eddy Wally, enz.Mèt de Zangeres Zonder Naam maakde Sjeng same mèt Johnny Hoes hits wie Mexico, De Bedelaar van Parijs, De Meid van de Straat, De Smokkelaar, Mandoline in Nicosia, Keetje Tippel enz. Johnny Hoes had ouch bekinde hits wie, Och was ik maar bij Moeder thuis gebleven, Daar mag je alleen maar naar kijken, Dat is het einde enz. De aller groetste hit dee Sjeng Kraft sjreef en bewerkde veur De Electronica's waor De Vogeltjes Dans. De Vogeltjesdans waor oersprunkelek gesjreve door Werner Thomas meh Terry Rendall (Louis Rymenant) bewerkde 't leedsje in 1980. Sjeng Kraft maakde dao 'n hit vaan en späölde same mèt De Electronica's op de grammefoon-plaat. Wereldwied woort 't e groete hit mèt e verkaop vaan mie es 35 miljoen plate. In de Hollandse Top 40 mèt de hoegste notering op 'n veerde plaots. Mèt 't hoesorkes maakde en produceerde heer ouch plate mèt Massada, Oscar Harris, Harry Bordon, en Frits Rademacher.Sjeng Kraft sjreef ouch väöl Mestreechter Vastelaovends leedsjes en 't ierste winnend leedsje vaan häöm waor in 1952 D'n Drekmaan, dat door de raod vaan Elf vaan de Tempeleers tot ‘t winnend Vastelaovends-leedsje woort oetverkore. Twie jaor daonao in 1954 sjreef heer Miene Maan, dat ouch woort oetverkore tot 't winnend Vastelaovends-leedsje vaan Mestreech.
Väöl suksès had heer same mèt zien dochter Beppie, boe heer ummertouw Mestreechter nommers sjreef, mèt in 't bezunder Vastelaovends leedsjes. 't Ierste leedsje dat Sjeng veur Beppie sjreef waor in 1967 't winnend Vastelaovends leedsje, Diech Kins Miech Tra La La. En 't jaor daonao sjreef heer same mèt J.Pletzers 't winnend Vastelaovends-leedsje De Knievel, en in 1977 same mèt J.Pletzers, Hand aon Hand. Bij 't oetbringe vaan dee Vastelaovends-single waor ummertouw ‘n strijt wee 't ierste 't singleke kós oetbringe, De Tempeleers of Telstar. In 1980 kaom 't tot e meinings versjèl tösse Telstar en de Tempeleers. Tot winnend Vastelaovends-leedsje woort gekoze 't leedsje vaan Sjeng Kraft, Boe de Brouwer is, en Telstar wouw dat leedsje ouch in 't Hollands goon oetbringe, boe de Tempeleers fel op tege waore. Vaanaof dat momint heet Sjeng noets mie e leedsje ingesjik. Evels ouch zoonder mèt te doen aon 't Mestreechter Vastelaovends Leedsjes-concoer sjreef en compioneerde Sjeng Vastelaovends leedsjes, en wel speciaol veur zien dochter Beppie. Bekinde leedsjes dee Sjeng Kraft veur zien dochter Beppie sjreef waore oonder aandere in 1967 De Knievel en Gaank toch Kiene, in 1968 Kreigste e Kale Kop, in 1970 Kom gauw nao Hoes en Iech wach op Diech. In 1984, Es Diech Miech Puuns en Iech bin Kapot vaan Diech, in 1985, Miene Vogel is gevloge, en in 1986 't bekinde leedsje Kakkedie. Twie jaor later in 1987 broch Beppie häör plate in eige beheer oet oonder 't label vaan Marlstone, 't leedsje Iech bin zoe Verleef, en in 1988 Ach wat e Gelök, en in 1989 de hit De Nach is nog zoe laank.In 't begin vaan Sjeng's carrière trooij heer ouch deks in 't boeteland op zoe wie in Belsj en Fraankriek  oonder de naom vaan Jean Kraft. Heer späölde dao dèks väöl mussètte en mazurka meziek, dat me in die len gere huurde, en Sjeng had 'n eige verfijnde stijl dee herkinbaar waor bij de lui en leefhöbbers vaan accordeon-meziek. In 't jaor 2000 woort door de stiechting Sjeng Kraft Kompenei de koerazjeuze- pries vaan 't Sjengske ingesteld veur jong Limburgs meziektalent oet de wereld vaan Harmonie, Fanfare, en Klassieke meziek. Later woort de pries allein touwgekind aon Limburgse accordeoniste, aofwisselend aon jong talente en es ouvrepries veur beroopsmuzikante. De pries besteit oet e geldbedraag en 'n beeldsje vaan 't Sjengske. De oetverkore muzikant weurt aon 't groet publiek gepresenteerd en späölt in zien eige stijl 't bekinde Sjeng Kraft leedsje vaan Iech bin zoe verleef.....Adervernauwing bepaolde de lètste jaore vaan Sjeng Kraft zien leve. Hij kreeg hart en neerklachte. Sjeng merkde dat zien raozend-snelle accordeonspeul ummertouw minder woord. Dat kós heer mer meujelek verwerke. "Iech kin neet mie speule wat iech in miene kop huur ", zag heer op latere leeftied. 'n Herseninfarct woord de accordeonist noed-lotteg. Jean Kraft is gestorreve in Mestreech op 3 Juli 1999, op 74 jäörege leeftied.
De Limburger 14-11-1966.
't Sjengske.
Jean en Willy. 1980.
1924-1999.