Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Fons Olterdissen
Heinrich, Hermann, Olterdissen woort op 15 Juni 1827 gebore in Emden (Hannover) en is gestorreve in 1871 in Mestreech. Heer waor es 16 jaorege soldaot gelegerd in Mestreech, en waor later bookhawwer, winkeleer, en kaopmaan. Mestreech behuurde toen nog tot 'n Hertogdom, en veel binne de Duitse Boond vaan Staoten en had e soort beroops-leger. Later in 1850 kaom heer weer trök nao Mestreech en góng woene in de Hoenderstraot, woersjijnelek umtot heer verleef waor op e meidske dat in Mestreech woende. Heer trouwde mèt Alida Hendrica Femina Verhoef, gebore op 21 Oktober 1832 te Veere in Zieland, en is gestorreve op 19 Oktober 1924 in Mestreech. Op 21 Oktober 1857 trouwde zie in de Lutherse kèrk in de Hoondstraot. Same hadde zie 'ne sigare winkel aon de Boschstraot nommer 963 (105). De zaak leep good jummers de mieste klante kaome oet de naobij gelege febrikke vaan Regout. Zie kraoge same ach kinder,veer jonges en veer meidskes,  boe vaan d'r mer twie euverbleve, naomelek Guus en Fons. De aander kinder storreve tösse de drei maonde en zeve jaor nao de geboorte. In deen tied waor de kindersterfte nog altied erg hoeg. Oet de ech vaan Heinrich Hermann Olterdissen en Alida Hendrica Femina Verhoef woorte 8 kinder gebore; 1.Louis Dorothea Olterdissen is gebore in 1859 in Mestreech, en storf ‘n paar maond later. 2.Guustaaf Adolf Olterdissen gebore op 7 Miert 1860 in Mestreech, en is gestorreve in Mestreech op 25 Oktober 1946. 3.Petrus Herman Olterdissen is gebore in 1861 in Mestreech, en gestorreve in 1868. 4.Edmond Lodewijk Alexander Olterdissen is gebore in 1863 in Mestreech, en is twie maond later gestorreve. 5.Emma Hermina Constatia Olterdissen is gebore in 1864 in Mestreech, en gestorreve in 1865. 6.Alphonse Victor Olterdissen is gebore op 12 December 1865 in Mestreech, en is gestorreve op 24 Fibberwarie 1923 in Mestreech. 7.Mathilda Maria Olterdissen is gebore in 1867 in Mestreech en gestorreve in 1868. 8.Hermina Henriette Olterdissen is gebore in Mestreech in 1871, en gestorreve in 1873. Fons weurt es zesde kind gebore op 12 December 1865, en kraog de naome vaan Alphonse,Vitor, en de roopnaom vaan Fons. Heer woort geduip op 22 December 1865 in de Lutherse kèrk. Wie Fons ach jaor waor störref ziene pap. Zien mam veranderde de naom vaan  de sigarezaak in Madame de Weduwe Olterdissen. Zie verhuisde in 1870 nao de Mèrret op nommer 24 boe zie de zaak in 1924, 54 jaor laoter verkoch. Nog gein tien maond daonao störref de mam vaan Fons. Zie woort 91 jaor. Zien broor Guus waor vief jaor ieder gebore en wel op 7 Miert 1860. Heer kraog de naome vaan Guustaaf, Adolf. Op 21 Augustus 1900 trouwt Guus mèt May, 'n zuster vaan Henri Goovearts, en Henri waor 'ne vreund vaan Fons. May en Guus kraoge same in 1901, eine zoon Herman Siegfried. De gebreurs Fons en Guus kóste good mèt ein opsjete, en beteikende daan ouch väöl veur ziech. Guus woort musikant en later oonder-directeur bij de stedelijke mezieksjaol. Guus storf in 1942 en woort begraove op de begraofplaots vaan 't Witte Vrouweveld. In 1962 woort zien liechaam euvergebrach nao de algemeine begraofplaots aon de Tongerseweeg bij zien broor Fons. Herman Siegfried Olterdissen waor de einigste erfgenaom vaan ziene Pa Guus en vaan Fons, ziene noonk. Mèt de erfenis dao woort neet verstendeg mèt umgegaange umtot beveurbeeld de zegelrink, dee speciaal veur Fons waor gemaak, tot veer kier touw woort verkoch aon de baank vaan lienig in Utrecht. Väöl toneelstökke woorte veur 'nen appel en ei verkoch en de orginele mèt hand gesjreve stökke vaan De Kaptein vaan Köpenick, woorte  veur 60 gölde verkoch.
Zoe wie in 't geboorte hoes vaan Olterdissen es de woening gelege aon de Mèrret, is 'ne gedinkstein geplaots vaan Fons die me nog ummertouw kin zien. Fons heet deks zien mam gehollepe, en achter d'n toenbaank in de winkel gestaande. Heer heel hiel väöl vaan zien mam en numde häör dèks " Mie leef aajdsje " of 't Zielke vaan miech " . Um vaan Mestreech 'nen echte kuns-stad te make, riechde heer in 1895 de vereiniging op vaan "Decoratieve Kunst ", um zoe de kunszin en de verdeiling vaan de ambachte beter te kinne make. Zie organiseerde tentoenstellinge, en kraoge d'n opdrach um groete stads poorte te make, wie Keuninging Emma en häör kroendochter Wilhelmina veur veer daog in Mestreech op bezeuk kaome. In 1896 geit Fons Olterdissen woene aon de Lage Kanaaldiek op Sint Pieter, perceis neve de ouwers vaan ziene vreund Henri Goovaerts. Henri Goovaerts reisde toen al väöl, meh had dao wel zien "Pied à Terre ". Fons riechde in zien nuie woening nen’ atteljee op, um zoe zien sjèlderije beter te kinne verkaope. Heer sjèlderde de Lambertus kapel vaan binne, dee neve zien woening stoond. In 1899 woort de nuie VVV Mestreech opgeriech, oonder de naom vaan "Maastricht Vooruit". Bij den’ ierste vergadering woort heer gekoze tot president. Oonder zien leiing organiseerde me veer groete cortèges in Mestreech, naomelek in 1905 'ne Historische stoet, in 1909 de Heiligdomsvaart, in 1912  Het Maria Congres, en in 1921 de Missiestoet. De neet katholieke Fons zörgde d'r veur tot zoe hoonderd doezende lui nao Mestreech kaome. Same mèt iemes aanders sjeerf heer, de in 't Mestreechs gesjreve De Kaptein vaan Köpenick. In deen tied is 't verhaol vaan De Köpenick wereldnuits en 't stök waor e groet suksès. Den'ierste oetveuring vaan De Kaptein vaan Köpenick waor 1907 in de Bonbonière. En later in de Dominikanerkerk (1968/1969), 't Vriethof (1986) en in de Sphinxzaol (1992/1993). In 1912 sjreef heer Trijn de Begijn, 'n kemikke opera dee geit euver 'ne woer-zègkster oet de St Antonius straot. Ouch heet Fons väöl kemedie stökke gesjreve en waor heer dèks d’n regiseur daovaan, meh heer späölde ouch dèks mèt. Zien groetste prèstatie lieverde heer bij de kemedie mèt 't stök " Het Spel van Sint Servaas " 'n spektakel stök vaan de Heiligdomsvaart in 1916, boe aon 600 lui mèt spaolde en zie 'ne décor maakde vaan 50 meter breid en 10 meter hoeg. Fons kós good vertelle en ziene vreund Jacq van Term hoof-redakteur vaan de 'Limburger Koerier ", vroog um die verhaole op te sjrieve, verhaole euver de Mestreechter Historie. Zien stökke zien 'ne woere gesjiedenis-book euver in deen tied, 't leve in Mestreech. Fons keump later ouch in de Gemeinteraod en weurt Inspecteur vaan de sjaole. De kinder sterfte waor in die jaore nog altied hoeg en heer heet ziech ingezat um de kinder gooi voeding te geve en veur de baby's 'n gooi opvang te regele. De crèche kraog de naom vaan Juliana en besteit nog ummertouw en is gelege aon de Lurestraot boe ouch ter iere vaan häöm 'n standbeeld is opgeriech. Fons Olterdissen is op 58 jaorege leeftied gestorreve op 24 Fibberwarie 1923 in Mestreech.
De Kaptein vaan Köppenick oppe Vriethof.
Beeld vaan Alphonse Olterdissen gemaak door Willem Hofhuizen. Groete Loeiersstraot.
Heinrich , Hermann, Fons Olterdissen
De Kaptein vaan Köpenick. Gram.Plaat.
Graaf vaan Fons en Guus Olterdissen.
Mestreechter Vertelsels
Prozawerke.
Broor Guus Olterdissen.
Heinrich , Hermann,(Fons) Olterdissen. 
1827-1871.