Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Roeje Pierre
Pieter Lodewijk Joseph Geijsen woort gebore op 20 Juli 1930 in Meerse, en is gestorreve op 28 November 2000. Pieter Lodewijk Joseph Geijsen waor vaan beroop unssjelder, en had gestudeerd aon de Jan van Eyck Academie. Oonder de naom vaan Joseph Geijsen kint geine mins häöm, meh bereump en gèt slech aongesjreve waor heer bekind oonder ziene sjuilnaom vaan de Roeje Pierre. De sjrik vaan 't Quartier Latin vaan Mestreech ! Vervlook meh ouch geleef in 'nen aontal kaffee's vaan eus stad. Heer waor ‘ne vaste klant bij kaffee  "De Trubinal", kaffee Ma van Sloun, en bij kaffee 't Knijpke. Dao deeg heer zoe af en touw gèt mèt helpe, meh heer zaot miejer veur d'n toog daan d'r achter, zoetot heer zien gleeske beer en zien dröpke kós drinke. Ouch staok heer ziech 'ne dikke sigaar op, en kós genete vaan de lui um häöm heen. ’t Knijpke, kaffee, cinema, en eetkaffee, waor in deen tied e begrip veur edere Mestreechteneer en wiet dao boete. Jef Vliege waor d’n eigeneer vaan 1966 tot 1989 vaan dee kaffee-bistro. Dee gooje maan waor in Groonsveld gebore en ‘ne riechtige levens-geneter. En dao paste De Roeje Pierre ouch good bij, umtot heer ouch in dat rijjke  vaan levens-geneters toes waor. Op de begaonde groond vaan de kaffee waor nen’einzaolige cinema gemaak, boe me bekaans edere daag ‘ne film kós bekieke. In de kelder-kaffee kós me ouch ziech te good doen aon lekker escagots, unnesop, of  e frans kies-plènkske. En dat same mèt e lekker gleeske beer of wien. In de kaffee stonge groete houte taofels en ‘ne ope haard dee ummertouw brande. De Roeje Pierre behuurde ouch tot ‘t meubelaer vaan ’t Knijpke en heer heelp  zoe af en touw mèt, es ’t góng….,  door gèt lege glazer op te holen en die daan um te speule. Jef Vliege had e bitsje compassie mèt häöm en leet ‘m mer gewere. ’t Knijpke dreijde good mèt ‘nen umzat vaan zoegèt twie miljoen gölde. Jef Vliege góng woene op de Walmoer, same mèt zien vrouw Lea en dochter Sietse en zoon Boris. In Cadier en Keer had heer nog e groet femilie-bezit boe in de stalle zoegèt 20 piano’s stonge. Meh Jef Vliege is netuurlek ouch bekind es filmproducent vaan films. Same mèt regiseur Guido Pieters maakde heer zien ierste film “Vaarwel” mèt Pieke Dassen. Dee film woort wie me zeet e groete flop, mèt d’r aon vas, e groet verluus. ’t Verluus waor zoe oongeveer 350.000 gölde.!!
Later koste zie dat weer e bitsje goodmake door ‘n film te make vaan “Dokter Vlimmen“ mèt oonder aandere Monique van der Ven en Peter Faber. Op ’t filmfestival vaan Cannes waor Jef mie es dertig jaor present en heet mèt hiel väöl sjoen vrouwlui dao euver de roeije luiper gelaope. In 1981/1982 maake Math van Even en Joep Koster ouch ‘ne film in en door Mestreech, naomelek “Commissaris Fanfaron en de Poesjenellemoord”. De commesaris móos de moord op poppespeuler Pieke Dasse op losse. De film späölde ziech aof in de kaffees en straote vaan Mestreech mèt  bekinde Mestreechter Volks-tiepe’s, wie de Roeje Pierre, Rika Cesarin. Ouch ‘nen aontal hospes hadde ‘n rol in dee film. Hoes-arts Frank Smits späölde de rol vaan Commesaris Fanfaron. De film woort in 1987 vertoend in Kaffee ’t Knijpke en later heet me de film op ‘ne DVD gezat. Euver laope gesproke ! De roeje Pierre zaog me ouch ummertouw vaan wiet aof aonkaome waggele, umtot heer te deep in ’t gleeske had gekeke ! Heer droog ummertouw e wit kostuum (es ’t zuver waor.. ) dat fel aofstaok mèt ziene roeje baard. Koed-aordig waor heer gaar oet neet, en geine mins had las vaan häöm. Meh d’n hospes had soms wel gèt meujte mèt häöm, umtot es heer gèt te väöl gedroonke had, in slaop veel, en lang bleef haange zoonder gèt te drinke. Aon ’t einde vaan zien carrière waor heer nog mer in twie kaffee’s welkom. Heer kraog neet  te väöl beer mèt sjenever zoetot heer neet mie zaat kós weure. Meh nao ’t bezeuk aon de twiede kaffee had heer genóg op um weer sjeigelend-terend  nao hoes te goon. Zien kostuums woorte dèks gereinigd mèt hölp vaan ‘ne hospes, dee daan zörgde tot ze nao de stomerij De Lelie of Phalte woorte gebrach.Veur e paar daog waor heer weer toenbaar en zaog weer propel oet. ‘Ne jonge klaore, ‘ne groete sigaar, en e wit kostuum, dat waor zien kinmerk. Väöl lui gaove häöm de bijnaom vaan De Kardinaal of Bisshop. Heer heet indrök gemaak umtot heer de medische wetensjap veur gek heet gezat en ...umtot heer op zien meneer vaan leve, nog zoelang heet kinne leve. Pierre is op 28 November 2000 in Mestreech gestorreve.
Roeje Pierre.
Roeje Pierre op weeg nao kaffee de Trubinal.
Kaffee de Tribunal.
Kaffee Ma van Sloun.
Kaffee ‘t Knijpke.
Film Commissaris Fanfaron en de Poesjenellemoord.
1930-2000.