Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Börgm.Coenegracht
Börgemeister/Maire Mestreech 1808-1815.
Christiaan Coenegracht gebore op 29 Juni 1755 in Mestreech, en is gestorreve op 18 Augustus 1818 in Heugem Mestreech, en begraove in de aw perochiekèrk vaan Sint Pieter. Heer waor 'ne zoon vaan Nicolaus Coenegracht en Anna Catharina Goesens, en waor den’ ierste Mestreechse Börgemeister (Maire) vaan Mestreech in de jaore vaan 1808 tot 1815. Heer had wijsbegeerte en rechtsgelierdheid gestudeerd aon de Hoeger Sjaol vaan Leuven. Christian Coenegracht waor kaopmaan, wie de Franse Mestreech op 3 November 1794 veroverde en innaome. In dat zelfde jaor 1794, waor heer ouch mèt eigeneer vaan de “Hollandse-Branderij”(jeneverstokerij)  in de Rechstraot, in Wiek-Mestreech. In 1806 deeg heer dee zaak euver aon ziene ajdste zoon Marie Joseph Joannes Theodorus Coenegracht. Christian Coenegracht waor getrouwd mèt Sara Catharina Bemelmans, gebore op 27 Jannewarie 1750, en is gestorreve op 26 Fibberwarie 1829. Zie waor 'n dochter vaan 'ne " Préposé en Chèf de l'Octroi," door wie heer, um zien veurdeil d'r mèt te kinne doen, miermaole op de huugde woort gebrach vaan verhandelinge vaan domein-geujere. De Franse vestigde in Aoke 'ne centraal bestuur vaan len, tösse Rijn en Maos, die ingedeild waore in Arrondisseminte. Me kós Coenegracht euver holen um zitting te numme in 't Arrondissemint-Bestuur vaan Mestreech. Heer woort geïnstalleerd op 3 December 1794 in 't aw Staotenhoes. Bij 't verdrag vaan Den Haag in Mei 1795 woorte Staots Vlaandere, Staots Limburg, en Staots Gelre door de Bataafse Republiek aon Fraankriek aofgestoon. Op 1 Oktober 1795 woorte de Zuideleke Nederlande in 9 Departeminte ingedeild en bij de Franse Republiek ingelijf. Vaanaof dat momint waore veer Mestreechtenere, officïeel Franse staotsbörgers. Mestreech woort de hoofplaots vaan 't Departemint Neder Maas. Ouch waor Coenegracht in dee periood Griffier vaan 't Crimineel Departemints-Gerech in Mestreech, en lid vaan de raod vaan Perfectuur. Op 18 Miert 1808 woort heer door keizer Napoleon benump tot Maire vaan Mestreech. Christiaan Coenegracht waor den' opvolger vaan Maire Pierre Etiene Monachon (1801-1808) en Emanuel, Joseph Lefebvre, dee Maire vaan 1800 tot 1801 in Mestreech waor. Mestreech waor officïeel Frans groondgebeed meh woort wel bestuurd door Mestreechtenere. Meh Maire Christian Coenegracht waor neet al te zier Frans-gezind, meh heet in deen bewoge tied, e tactvol beleid geveurd in de stad Mestreech.
Bij de euvergave (trökgave) vaan de stad Mestreech aon de Nederlande op 5 Mei 1814, (Keuning Willem I) woort de gehiele gemeinteraod veurluipeg gehandhaaf, en bleef Christian Coenegracht Maire - Börgemeister vaan Mestreech. Heer bleef Börgemeister tot 16 Mei 1815, wie Keuning Willem I 'ne bestuurs-vernuiing doorveurde in Mestreech. Heer woort opgevolg in 1815 door 'nen ierste Börgemeister vaan Mestreech vaan de Nederlande, naomelek Joonkhier André Charles Membrede. Coenegracht woort benump tot raodslid, wat heer is gebleve tot aon zien doed op 18 Augustus 1818. 't Nui Stads-bestuur woort op 3 Juni 1815 plechtig geïnstalleerd door 'ne gedillegeerde vaan de Gouveneur vaan Braobant, boe oonder Limburg toen nog behuurde. Christian Coenegracht woende op Kestiel " De Hooge Weerth " in Heugem en waor ouch eigeneer vaan kestiel Hoogcruts, Sinnich en Hoeve Lichtenberg. Ziene zoon, Marie Joseph Theodoor erfde 't kestiel-Hoeve Lichtenberg. Heer is gestorreve op 12 December 1839, wie heer 53 jaor waor. Zien dochter Maria Christina Sara Dorothea, gebore op 23 September 1838 en gestorreve op 4 Mei 1866 ( 27 Jaor), bewoende daonao 't kastiel en trouwde mèt Hubertus Theodorus Laurentius Straetmans, gebore op 16 Juli 1862 en is gestorreve wie heer 35 jaor waor op 5 Mei 1873. 't Door de Franse Geconfisceerde kastiel Lichtenberg woort op 15 februari 1809 door Christian Coenegrach gekoch veur 76.000 francs vaan de Franse administratie. De ajdste zoon vaan Christian Coenegracht 's broor Lambert Paul waor Johannes Lambert Coenegracht. Heer woort gebore op 12 Jannewarie 1798 in Oudkerk Friesland en is gestorreve op 14 Juli 1861 in Mestreech.
Heer waor milletaer en volgde zien milletaere opleiding, tijdens de inlijving vaan Holland door Fraankriek, in Paries vaan 1812 tot 1815. In 't jaor 1829 woort heer es 1e Lutenant-Adjudant vaan 't 27e Battaillon Nationale Militie, euvergeplaots nao 't 1e Battaillon Jagers. Oonder comando vaan kolonel W.H. baron van Heerdt tot Eversberg, heet heer aon de Tiendaagse Veldtoch deilgenome. Heer kraog den’ orde vaan 't Metale Kruis. In 1855 woort heer benump tot Kolonel Brigade-Commedant vaan 't 3e Regimint Infanterie en belas mèt 't opperbevelsjap vaan de Vestiging vaan Mestreech. Dao woort heer op 29 Miert 1858 bevorderd tot Generaol-Majoor-Bevelhebber. Heer kraog nen’ aontal decoraties veur zien milletaere verdeenste. Ouch heer is bijgezat in 't femiliegraaf op Sint-Pieter.
Cristian Coenegracht.
Kestiel De Hoge Weert.
Femiliewape Coenegracht
Kestielhoeve Lichtenberg.
Cristiaan Coenegracht waor getrouwd mèt Sara Catharine Bemelmans. Zie is gebore op 27 Jannewarie 1750 in Mestreech en waor ‘n dochter vaan Antonius Bemelmans en Joanna Catharina Bernard. Sara Coenengracht is gestorreve op 26-2-1829. Oet de ech vaan Cristian en Sara woorte veer kinder gebore: 1.Anna Catharina Antonia Christina Coenegracht, gebore op 18 Jannewarie 1783, en is gestorreve op 24 oktober 1810. Zie waor neet getrouwd. 2.Henricus Godefridus Christianus Joseph Coenegracht, gebore in Mestreech op 6 september 1784, en is gestorreve ? 3.Maria Josephus Joannes Theodorus Coenegracht, gebore in Mestreech op 7 November 1786, en is gestorreve op 12 December 1839. Waor groond-eigeneer en trouwde in Mestreech op 26 Oktober 1836 mèt Thérèse Gabriele Christina Elisabeth de Ras, gebore in Arras (Fraankriek) op 19 Augustus 1812, en waor dochter vaan Martinus de Ras en Dorothea Helene Kamps. Zie hertrouwde later mèt Maria Emanuel Victor Alexander Coenegracht 4.Maria Emanuel Victor Alexander Coenegracht, gebore in Mestreech op 6 Aprèl 1788. Heer trouwde met Thérèse Gabriele Christina Elisabeth de Ras, gebore in  Arras (Fraankriek) op 19 Augustus 1812. Zie waor weduw-vrouw vaan Maria Josephus Joannes Theodorus Coenegracht. Thérèse Gabriele Christina Elisabeth de Ras,waor ‘n dochter vaan  van Martinus de Ras en Dorothea Helene Kamps. 5.Christianus Antonius Nicolaus Eugenius Coenegracht, gebore in Mestreech op 26 Aprèl 1789, en is gestorreve in Utrecht op 13 Fibberwarie 1821, en waor neet getrouwd. 6.Anna Catharina Antonia Christina Coenegracht, gebore in Mestreech op 28 Oktober 1790, en is gestorreve op ?.
1755-1818.
Femilie waope Christian Coenegracht.