Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Carl Smulders
Carl, Antoon Smulders, ouch wel genump Karl, Karel of Charles Smulders woort gebore op 8 Mei 1863 in Mestreech, Sint Pieterstraot, en is gestorreve op 21 Aprèl 1934 in Luik. Heer waor 'ne componis, pianis en roman-sjrijver. Karel  trouwde in 1902 mèt Anna, Maria, Charlotte, Isabella Fouquet, gebore op 4 Jannewarie 1861 in Brussel. Zie waor ‘n dochter vaan de bekinde Mestreechter (erme) arts Fouquet. ’t Houwwelek bleef zoonder kinder, en nou nege jaor houwelek kaom d’r den’ echsjeiing. Ziene Pa, Frederik Hendrik Smulders gebore op 30 December 1823 in Amsterdam, en is gestorreve op 19 Augustus 1896 in Mestreech, waor piano technicus, kaom oet Amsterdam en waor getrouwd mèt Anna Magdalena Voorgang, gebore op 9 Miert 1827 in Sittard, en is gestorreve op 26 Oktober 1913 in Mestreech. Frederik Hendrik Smulders begós in Mestreech ‘n piano handel, mèt verheure, bouwe en of verkaope vaan piano’s. Zoe kraog Carl daan ouch zien veurleefde veur piano’s en meziek mèt de paplepel ingegote. Oet de ech vaan Frederik Hendrik en Anna Magdalena woorte 9 kinder gebore. 1.Wijna Helena Smulders, gebore op 24 Miert 1859, en is gestorreve op 15 Augustus 1875. 2.Anna Maria Smulders, gebore op 13 Juni 1852, en is gestorreve op ? 3.Gerard Smulders, gebore op 16 September 1853, en is gestorreve op 30 December 1906. 4.Frederik Johannes Smulders, gebore op 4 December 1856, en is gestorreve op 16 Augustus 1857. 5.Frederik Johannes Smulders, gebore op 22 Miert 1861, en is gestorreve op 31 Juli 1866. 6.Carl Antoon Smulders, gebore op 8 Mei 1863, en is gestorreve op 21 Aprèl 1934 in Luik. 7.Helena Sofhia Smulders, gebore op 3 Mei 1865, en is gestorreve op ? 8.Frederica Sophia Smulders, gebore op 18 Juni 1867, en is gestorreve op 16 Juli in Ermelo. 9.Frederik Hendrik Smulders, gebore op 24 Augustus 1869, en is gestorreve op 4 Juli 1870. Karel Antoon Smulders had zjus wie ziene Pa ‘ne veurleefde veur pianotechniek meh heer had spietig genóg gein gooi verstand-hajding mèt ziene Pa. Tijdens zien sjaoljaore op de H.B.S kraog Carl Smulders al piano lès, en begós heer al besjeie composities te sjrieve. In 1878 góng Karel wie heer 15 jaor waor, studere aon ’t Conservatoire Royal de Musique de Liège, naotot heer iers geperbeerd had um ‘ne wiskunde opleiding in Delft te volge, en ‘n Offeceers opleiding in Schoonhove dee ouch neet doorgóng. Ein vaan zien ierste composities op ‘t Conservatorium waor ‘n pianotrio, dat bezunder good in de smaak veel vaan ziene liermeister. Heer woort weijer vrijgestèld vaan de mieste lèsse en kraog allein nog compositie-lès veur koer, vaan de directeur Jean-Théodore Radoux. In 1886 kraog heer ‘ne gouwe medaalje veur zien piano-konzèr in a klein. Zien Cantate Andromède woort in 1891 bekroend mèt de Brusselse Prix de Rome. Karel Smulders woort nao zien eind-exame in 1889 lieraar Harmonie en Solfège-lier aon ’t eigeste Conservatorium vaan Luik, dat häöm zellevers had opgeleid. Meh um deen  aonstèlling te kriege mós heer ziech laote naturalisere tot Belsj. Bekinde studente vaan häöm waore in deen tied René Defossez en Benoit Franssen.
Es componis kraog heer ummertouw miejer suksès, ouch door de hölp vaan Alphons Diepenbrock dee in “ De Nieuwe Gids ” ‘n artikel had gesjreve euver ’t bezundere gaof vaan Karel Smulders. Same behuurde Diepenbroek en Smulders tot de wienege Nederlandse componiste die ziech miejer tot de Franse daan vaan de Duitse meziek voolte aongetrokke. In ’t werk vaan Karel Smulders kin me daan ouch ‘nen invlood zien vaan de sjaol vaan César Franck, neve de verwantsjap vaan Edvard Grieg. Heer veulde ziech ouch sterk verwant mèt ‘ne lierling vaan César Franck naomelek Guillaume Leken dee later ouch ziene bèste vreund woort.  Guillaume Leken storref  vreug in 1894 en dat waor de reie vaan soomberheid dee Karel Smulders neet mie te bove kaom. Op 30 Aprèl 1896 späölde Karel zien pianokonzèr in ’t Amsterdamse konzèr-gebouw oonder leiing vaan Willem Mengelberg. ’t Waor e groet suksès, meh de componis ambieerde gein weiere oetveuringe umtot heer openbare optrejjes sjouwde. Mengelberg bewoonderde de meziek vaan Karel Smulders en späölde mèt ’t Konzèrgebouw-orkès ouch aandere stökke, zoewie “ Chant d’ Amour ” en Rosch Haschana. Karel Smulders had nog miejer gaof en deeg zjus wie ziene Pa oetvindinge op ’t gebeed vaan piano-techniek, wie de pédale expressive, boemèt ’t timbre of de geluids-stèrkte vaan ‘nen aonslaag toen veranderd kós weure. ’t Pendaal woort door de Pariese pianobouwer “Gaveau” gemaak op ‘nen aontal vleugel-piano’s. Bereumpde pianiste oet deen tied wie Paderewski, Cortot, De Greef en Backhaus lete ziech prijzend d’r euver oet, wie ouch Keunigin Elisabeth vaan Belsj, die ouch zoen piano in häör bezit had. Neet allein verbeterde heer ummertouw de techniek aon zien piano meh ouch perbeerde heer zien eigeste pianistische techniek te verbetere.  
Dat góng zoe wiet tot heer zien pees, die de vingers verbint, operatief deeg door snije, zoetot heer soepeler piano kós speule. Karel Smulders had ouch literair gaof en bewoonderde en sjreef mèt Herman Gorter en vertaolde sonnette’s vaan Jaques Perk in ’t Frans. Heer sjreef in die jaore tösse 1906 en 1913 ’n veertal Frans-taolige romans boe heer väöl sukses mèt had. In de jaore vaan den ‘ ierste wereld- oorlog woende heer in Mestreech en componeerde veural  leedsjes um daomèt de Belzje kriegsgevaangene te oondersteune. Umtot heer nijging vaan depressiviteit en defaitisme had, kaom Karel Smulders creativiteit gedeiltelek tot stèlstand.Vaan Smulders meziek weurt allerwijl af en touw inkele wèrke veur mannekoere, wie Le Mer oetgeveurd door de Mastreechter Staar. Zien romans weure veural in Walonië geleze. In Mestreech is de Karel Smulders straot nao häöm genump. Roond 1900 had Carl Smulders ‘nen oetstekende naom es musicus en componis gekrege door gooi relaties te höbbe mèt ‘t Nederlandse en Belzje meziekleve. Karel Smulders storf wie heer 71 jaor waor, in 1934 aon ‘ne leverkwaol.  
Bekinde Wèreke vaan Karel Smulders.  *  Concert in a-mineur veur piano en orkest (1886), opgedrage aon Jean-Théodore Radoux.  *  Rosch-Haschana, Prière pour violoncelle et orchestre (1898), opgedrage aon Arnold Vrijthof.  *  Adieu, Absence et Retour (1898),(symfonisch gediech) opgedrage aon Willem Mengelberg .  *  Chant d'amour (1900), symfonisch gediech.  *  L'Aurore, Le Jour, Le Crépuscule, Hymne au Soleil (1902), symfonisch gedicht, opgedragen aan Sylvain Dupuis  *  Ymnis et Numaine (1904),'ne balade veur zangstum en orkes op tekst vaan Richard Ledent. 
Kamermeziek . *  Trio veur piano, viool en cello (1880) . *  Cantilene veur piano en viool (1894), veurstudie voor 't onvoltooide symfonisch gediech Hildhyllia,  *  Sonate nr. 1 veur piano en viool (opgedrage aon Alphons Diepenbrock)  *  Sonate nr. 2 veur piano en viool .   Manne Koer .  *  La Mer  *  La Route  *  Pater Noster  *  Ave Maria  *  Au Soleil  *  Psaume  *  Les Animaux malades de la Peste  *  Cloches de France (1914) *  Vae Victus (1914)  *  Fleurs de France (1914) 
1900.
Carl Smulders 1887.
Carl Smulders 1920.
Woening vaan Carl Smulders gelege aon  de Hubertuslaan nommer 1.
1863-1934.