Ber Hollewijn
Bèr Hollewijn woort gebore op 13 December 1907, en is gestorreve op 17 Mei 1978 in Mestreech. Bèr Hollewijn waor getrouwd mèt Maria Gulikers, gebore in 't jaor
1906 en is gestorreve in 1992 in Mestreech. Bèr Hollewijn waor ‘ne riechtige Volksjrijver dee de gaof had um verhaole te make, die oet ’t leve gegrepe waore. Ziene
bèste vreund Louis Dassen sjreef bij ’t euverlije, e sjoen verhaol euver häöm. Op sjaol waor heer eder jaor mèt de sjoenste punte euvergegaange. Heer waor ‘ne
veurbeeldege mèssendeender in zien parochiekèrk vaan de H.Theresia kerk. Ouch stóng heer hoeg aongesjreve bij zien vrun, umtot heer bezunder good de weeg wis,
in de gèng vaan de katsje en in de wèrreke. De broeders op zien sjaol, hadde al vreug gezeen tot Bèr Hollewijn ‘ne bezundere gaof had um kemedie te speule en te
sjrieve. Meh ouch zien bezundere gaof um zien gedachte in wäörd en gesjrif um te kinne zètte had heer. Nao ziene sjaol-tied góng heer wèrke es ‘ne mindere vaan ‘ne
Gemeinteleke Deurwaarder. Same gónge zie op weeg en dao zaog Bèr Hollewijn väöl elend in volleksbuurte, dat later dèks tot uting kaom in zien kemedie-stökke.
Heer deeg dat in zien stökke besjrieve en brach dat mèt zien kemedie-speulers op de buun. Wie heer lieraar waor gaof heer lès in kulturele vörming en
maotsjappijlier. Heer heel spreekbäord op awwer-aovende meh ouch veur aander vereineginge, wie dèks veur kathelieke vereiniginge. Tösse de jaore 1942 en 1964
sjreef Bèr Hollewijn 54 kemedie-stökke, musicals en operettes, boevaan ‘ne groet aontal in us Mestreechter taol. Dèks gebruukde heer es sjrijver ‘nen aandere naom,
naomelek dee vaan Sjesco Orenz. In ’t jaor 1942 riechde heer same mèt ziene vreund Harie Loontjens (1914-2001), ’t volleks-tejater “ De Kemedie-Speulers” op.
Gemeinelek sjreef Bèr Hollewijn de teks en Harie Loontjens de meziek vaan die kemedie stökke. Meh Bèr waor d’n artistiek leier
vaan “De Kemediespeulers”. In ’t jaor 1943 sjreef heer ’t bekinde passie-drama “De Kruusweeg”. Dat waor ‘nen ech volks en
relizjieus stök in veer bedrieve, dat leefs 180 kier door de speulers op de buun woort gebrach. Twie jaor later, in 1945 sjreef heer ’t
stok “De Groetste Leefde”, en in dat zelfde jaor, same mèt Harie Loontjens ’t bekinde stök “ ’t Zigeunerkamp”. Bij den’ oetveuring
vaan dat operette-kemedie-stök, had me drei persoene bedach die ‘ne rol es “ De Zwerrevers ” späölde. Dat trio waor, Giel Defeche
es Keube, Jan Hollewijn es de Zeute alias de Bolhoed, en Harie Loontjens es Flupke. Same späölde zie ‘ne belaankrieke rol in ’t nao-
oorlogse ammuzemint in Mestreech. ’t Waor riechteg Volkskemedie wat zie, de ”Kemediespeulers”, in de kemedie-zaole späölde.
Die dreij speulers waore ouch dèks te hure op de radio, naomelek bij de R.O.Z.
De R.O.Z waor de veurläöper vaan de L1. Zie stopde op de radio op ’t hoegtepunt vaan hun suksès in ’t jaor 1960.
De Kemedie-Speulers gónge nog 'nen aontal jaore weijer in de tejaters, meh stopde mèt kemedie speulen in ’t jaor 1964. Bèr Hollewijn
sjreef in 1945 “De Groetste Leefde”, e passie verhaol. Twie jaor later in 1947 sjreef heer ’n nui stök veur de Zwerrevers
“In De Gouwe Lanteerie" : ‘ne Mestreechter operèt mèt de Drei Zwerrevers weer in de hoofrol. Aander stökke dee Bèr Hollewijn heet
gesjreve zien oonder aandere: “Höllep”, e lachstök in drei bedrieve, “Revolutie” (1949) e kemediespeul, “De Wereld Draait” (1949) e
kemediestök, “Slivvenier in Mestreech” (1950) en zoe nog väöl mie ! Ouch heet heer ’nen aontal beuk gesjreve wie “Slaven van het zwarte
goud”, “Sjangkel” ,“ ’t Bekkerke” en “Pieke uit het Stokstraatkwartier” ‘n roman. ‘t Verhaol geit euver de jäög-jaore vaan Pieke. In ’t book
weurt besjreve de slechte leef umstandighede in ’t Stokstraot keteer vaan veur en nao de’n oorlog. Ouch de strijt, die ’t werkvolk had tege
de kapitaliste, stoon centraal in dee roman. Wat Bèr Hollewijn wijer vaan zeleve veur de kathelieke zaak in Limburg heet gedoon is
meujelek oonder wäörd te bringe. Heer kraog ‘ne hoege kathelieke oondersjeiding naomelek ’S. Gregorii Magni “. Dee oondersjeiding is ‘n
Ridderorde vaan de Paus. Bèr Hollewijn storf op 70 jaorige leeftied. ’t Waor ‘nen eve invoudige es getalenteerde mins, ’ne zörregzaome
hoesvajer en ‘nen oetzunderleke gooje kammeraot. (Luis Dassen).
'Batteraof Pieke en ziene hónd Maoke'
R.v.Kesteren
Passiespeul De Kruusweeg
1943.
Program beukske vaan
‘t Zigeunerkamp 1945.
De Kemediespeulers.
Sjeng. Sjesco Orenz.
(Bèr Hollewijn)
Het Boerderijtje.
Slaven van het
zwarte goud.
1907-1978.