Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
    Arnold Huyn II van Amstenrade
Kestiel  Sint Jans Geleen.
Bijgebouwe vaan Kestiel Sint Jans Geleen.
Hoeve Printhage.
Arnold II Huyn van Amstenrade is gebore in 't jaor 1525 en gestorreve in 1579. Me neumde häöm ouch Arnold II Huyn, Heer van Geleen. Heer waor 'ne zoon vaan Arnold I Huyn van Amstenrade en Barbara van Maschereil. Arnold I waor iers getrouwd in 1517 mèt Catharina van den Bongard. Zie is kinder-loos gestorreve in 't jaor 1527. Arnold I waor toen umtrint 50 jaor, en de kans bestong tot 't geslach Huyn van Amstenrade en Heer van Geleen zouw oetsterve. Zien broor Caspar Huyn (vaan de tak Rivieren), had e sjoenzuster vaan 25 jaor, Barbara van Maschereil, ouch wel Henrica genump. Arnold I trouwde mèt häör in 1528,  en zie kraoge same 3 kinder. 1.Arnold II Huyn van Amstenrade,gebore in 1525, en is gestorreve in 1579. 2.Agnes Huyn van Amstenrade, waor getrouwd mèt Jan (of Gerard) van Imstenraad, heer van Mheer, gestorreve op 1 miert 1572, en begraove in de kerk vaan Mheer. 3.Maria Huyn van Amstenrade.trouwde op 23 Jannewarie 1556 mèt Arnold Schenck van Nydeggen, heer van Hillenraad. Arnold Huyn II waor den' ierste vaan 't geslach Huyn van Amstenrade dee ziech Huyn van Amstenrade Geleen góng of moch numme. Arnold II van Amstenrade trouwde in 1551 mèt Anna van Groesbeek, dochter vaan Johan van Groesbeek en Bertha van Goor. Oet de ech woorte 5 kinder gebore naomelek; 1.Arnold III Huyn van Amstenrade, gebore in 1555, en is gestorreve op 5 mei 1643. Arnold III ( Arndt), waor heer van Geleen en zoon vaan Arnold II Huyn van Amstenrade en van Anna van Groesbeek. 2.Willem Huyn van Amstenrade, gebore in 1555, en is gestorreve in 1594. Willem waor kapitein vaan ’n compagnie kurassiers in Spaonse deens. 3.Johan Huyn van Amstenrade, waor iers kanunnik in Luik, daornao trouwde heer mèt, Margaretha van Raesfelt, erfgename van Lüttringhausen. Nao de doed vaan ziene pa, woort heer mèt de heerlijkheid Eijsden beleend. 4.Anna Huyn van Amstenrade, waor kanunnikes in Munsterbilzen, daonao trouwde zie mèt Willem de Lamargelle, heer van Eijsden. 5. Agnes Huyn van Amstenrade, trouwde in 1586 met Karel van Hill. Nao de doed vaan ziene pa, Arnold I op 24 Jannewarie 1549, stóng zien Ma alle geujere en bezittinge vaan 't Kestiel Sint Jansgeleen aof, aon häöre zoon Arnold II. Dao waor ouch de Hoof bij vaan 't kestiel Sint Jansgeleen, de twie hove vaan Printhage, 't Leenhof en 't aajd hoes bij de aw kèrk vaan Spaubeek. Daodoor naom Arnold II de plaots in vaan ziene pa Arnold I. Meh zjus wie ziene pa, wouw Arnold II ziene höb wijer oetbreie. Dat deeg heer zoewel in Geleen es in de umgeving vaan Mestreech. Op 28 Juni 1550 koch heer 2 bunder land bij Borghare. Op 23 Augustus 1550 ruilde heer 10 bunder en 10 roeden land bij kestiel Sint-Jansgeleen, die in bezit waore vaan de Duitse Orde, veur 10 bunder in Limmel. Op 25 September 1550 koch heer 1 bunder en 3 kleine roeden in Mestreech. Op 25 Jannewarie 1551 koch heer 3 bunder en 14 roeden bij Meersen. Op 28 Oktober 1552 koch heer 3,5 morgen (’n morgen is ‘n aw opp.maot en gèt minder es ‘n hectare) bij Borgharen. Op 16 juni 1554 woort heer beliend mèt 't Stokleen ('n gift dat neet gedeild moch weure) Dentgenbach in Kerkrade. Dat waor e leen vaan de Mankamer vaan s'Hertogenrade. Op 18 December woort heer beliend mèt de Bergerhof. Dees hof laog tösse Driessche en Grijzegrubben en woort in 1880 aofgebroke. Allein de Bergerweg bij hof Driessche, rappeleert nog aon 't bestoon vaan de Bergerhof. De pa vaan  Arnold II waor al 'ns ieder eigeneer vaan de Bergerhof. Op 31 Juli werfde Arnold II weges, cessie 't “ Huis Witham” bij Nieuwstadt vaan zien sjoenbroor, Seger van Groesbeek.
Filips II van Spanje 1527-1598.
In 't jaor 1555 volgde Keuning Filips II van Spanje ziene pa Keizer Karel op, es Heer der Nederlande. Filips II zeukde nao geld um ziene oorlog mèt Fraankriek te kinne betaole. Heer góng domein-geujere tot “heerlijkheden” ('n heerlijkheid of heerschap is 'ne bestuursvörm vaanoet 'n feodale oonderverdeiling vaan 't euverheidsgezag in de middeliewe) samevoge, um die daan te verpande. Arnold II Huyn van Amstenrade góng same mèt zien achterneef, Werner Huyn van Amstenrade zake doen mèt Filips II. 't Resultaot waor,  tot Geleen en Spaubeek op 20 Jannewarie 1558 door Filips tot “Heerlijkheid” woort verheve. Arnold kraog de “Heerlijkheid “ in pand veur 3.050 Carolusgulden. ('n Carolusgulden of Karolusgulden waor 'nen awwe munt dee in de tied vaan Keizer Karel IV woort geslage). Heer moch ziech daan “Heer van Geleen” numme, 'ne titel dee ziene pa ouch al had. Nao zien benumming tot “ Drossaard “ vaan 't Land van Valkenburg en tot Gouverneur en Kaptein-Generaol vaan de Laden van Overmaas, gaof Arnold II in 1575 de Heerlijkheid Geleen euver aon ziene zoon Arnold III. De Heerlijkheid Geleen zouw bekans 'nen iew blieve bestoon, veurdat 't in 1654 euverging in 't Graafschap Geleen.Filips II verpande aon Arnold II op 23 Fibberwarie 1559  de Heerlijkheid Eijsden, en Arnold bleef tot zien doed in 1579 dao woene. Op 30 Miert 1577 woort heer door de Staten-Generaal van de Nederlanden benump tot Gouverneur vaan Mestreech. Op 29 Aprèl lag heer de eed vaan trouw aof aon de Keuning vaan Spanje, en aon de Prins Bisjop vaan Luik, zien zwaoger Gerard van Groesbeek. Um Gouverneur te weure waor 't nudeg um touwstumming te kriege vaan de 23 Ambachten vaan Mestreech. In 't naojaor vaan 1577 lag heer 't Gouverneur-sjap weer neer, umtot heer 'nen allegatie kraog mèt die Mestreechter ambachte, euver de presentie vaan Waolse Soldaote in de stad. Arnold II Huyn van Amstenrade is gestorreve in 1579 en woort begraove in de Sint-Martinuskèrk vaan Beek.
Kestiel van Wouw 1583.
Kestiel Beersel.
Hendrik van den Bergh.
Johan IV Corsselaar van Wittem, (Jan van Wittem) graaf van Zeebrugge, en baron van Boutersem, en Heer van Beersel, is gebore in 't jaor 1550 en gestorreve in Wouw op 1 Mei 1588. Heer waor 'ne zoon vaan Maximilaan Corsselaar van Wittem, Graaf van Zeebrugge, en Gilette van Halewijn vrouwe van Boezinge. Oet de ech vaan Maximilaan en Gilette woort gebore; 1. Johan IV Corsselaar van Wittem, graaf van Zeebrugge, en baron van Boutersem, en Heer van Beersel, trouwde in 1578 mèt Maria Margaretha Merode- Westerloo, markgravin van Bergen op Zoom. 2. Anna Corsselaar van Wittem gebore in 1550 en trouwde mèt Jacques d'Oignies Heer van Estrées. Boutersem boe Johan IV gebore is, is e plaots en gemeinte in de Belsje provincie Vlaams-Braobant. De gemeinte tèlt noe zoegèt 8.000 inwoeners. Ouch de plaots Beersel ligk in de provincie West Braobant. Johan IV Corsselaar van Wittem waor 'n Zuid-Nederlandse Edelmaan en milletaer, dee iers gekoze had, tijdens de 80 Jarige-Oorlog, veur De Staatse  meh later sloot heer ziech aon bij de Spaonse kant. Eind 1577 waor heer veur 'ne korte tied milletaer Gouverneur vaan Mestreech. In dee periood had Johan gekoze veur de Staatse partij. Heer waor mer inkele maonde Gouverneur, en had in deen periood väöl probleme. Heer drong dr'op aon um tróppe versterkinge te kriege, meh kraog die neet. Dat ouch door de tegewèrking vaan de 23 Ambachte in Mestreech. Op 25 November 1577, deende heer ziene congé in, es Gouverneur vaan Mestreech. Op 12 December 1577 trouwde heer mèt Maria Margaretha van Merode. Zie waor 'n dochter vaan Johan IX van Merode, graaf van Olen, Heer van Westerlo, Pietersheim, Diepenbeek, Perwijs, Herlaar, Duffel, Leefdaal, Ijselmonde, en Ridderkerk (1530-1602) en Mencia van Gylmes, vrouwe van Walhain en Eigenbrakel. (1540-1561). Maria Margaretha waor e nisjeke en erfgenaome vaan Jan IV van Glymes van Bergen, Markies van Bergen op Zoom. Maria Margaretha van Merode en Johan IV Corsselaar van Wittem had mer veer jaor 't bestuur euver 't Markiezaat Bergen op Zoom. Twie weke nao de inname vaan Breda door Claudius van Berlaymont op 28 Juni 1581, góng Jan IV nao Breda en zeukde kontak mèt de Hertog vaan Parma. Naotot zie de käös gemaak hadde veur de Spaonse kant vaan Parma, verklaorde de Staten van Brabant, dat de rechte vaan  Johan IV Corsselaar en Maria Margaretha van Merode, op 't markiezaat (bestuur vaan 'n gewest) vaan Bergen op Zoom waore vervalle. In December 1581 perbeerde Johan IV Corsselaar, de door de opstandelinge euvergenome stad Bergen op Zoom trók te verovere. Eve daonao sjoonke de Brabantse Staten 't Markiezaat aon prins Willem van Oranje. Nao de doed vaan Willem in 1584, góng 't weer nao ziene zoon Prins Maurits van Oranje. “n Deil vaan 't Markiezaat , 't land vaan Wouw en 'n groet gedeilte vaan 't Oostkwartier, bleef Spaonsgezind. Johan Corsselaar van Wittem en Maria Margaretha van Merode gónge woene op 't kestiel vaan Wouw boe ze alle twie storreve in 't jaor 1588. Oet de ech vaan Johan Corsselaar van Wittem en Maria Margaretha van Merode  woorte dreij dochjters gebore; 1.Margaretha Corsselaar van Wittem, Markiezin van Bergen op Zoom, (1580-1627). Zie trouwde in 1612 mèt Hendrik van den Bergh, Graaf van den Berg- s'Heerenberg, Heer van Stevensweert en Stadhouder van Gelre. 2.Maria Mencia Corsselaar van Wittem, Gravin van Walheim (1581-1613) trouwde in 1599 mèt Hendrik van den Bergh, Graaf van s'Herenberg. 3.Ernestine Corsselaar van Wittem, Gravin van Walhain (1590-1649) trouwde in 1612 mèt Claude Frans van Cusange, Baron van Belvoir en St - Julien.
Femiliewaope Corsselaar van Wittem.
Femilie Waope van Halewijn.
Zien zwaoger Gerard van Groesbeek.
Kestiel Wittem.
1550-1588. Gouverneur in Mestreech 1577.
1525-1579. Gouverneur in Mestreech 1577.
Femilie Waope Arnold II Huyn van Amstenrade.
Femilie Waope Johan IV Corsselaar van Wittem.
Maximilaan Corsselaar van Wittem, Graaf van Zeebrugge