Artieste
Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
In 't jaor 1910 woort in Mestreech de Limburgse Kunstkrink opgeriech en wel in Hotel-kaffee “De Suisse” oppe Vriethof, boe Zjang Boosten in deen tied de hospes waor. 't Doel vaan “De bende van Suisse” waor, 't stimulieren vaan de belangstelling veur de kuns, door 't organisere vaan tentoenstèllinge en lezinge. Hotel De Suisse oppe Vriethof waor de locatie boe vaanaof de opriechting de leie vaan de Limburgse Kunskrink bie-ein kaome veur lezinge en fies-aovende. Dat waor zoe in de jaore twintig, meh de leie koume nao dat stam-kaffee, ouch veur de gezèlliheid. In 1925 tèlde de krink 22 wèrkende en 132 neet werkende leie, 43 donateurs en zeve iere leie. De bekindste artieste vaan de Bende waore: Robert Graafland, Jules Brouwer, Henri Goovaerts, Hermann Bopp, Alphons Boosten, Guus Defresne, Henri Jonas, CharlesNypels, Han Jelinger, Herman Gouwe, Edmond Bellefroid, Jan Bakhoven, Charles Vos, Viv Reinders, Mathias Kemp, Frits Lousbergh, Harie Meisenber, Richard Vrijens, Domenick Stassen, Karel Gemmeke, Fons Reinders, Frans Lousberg, Alex Stols, en Jean Gregoire. Charles Vos waor e gèt zwiegzaom figuur, dee aoventouw zien collega's in de Suisse opzeukde, meh ze väöl liever bij ziech thoes deeg oontvaange. Neet um te praote of te discussiëre, meh um te zwiege. Henri Jonas waor ouch e persoen dee neet erg spraokzaom waor. Heer waor daan ouch ‘n regelmaotige gas bij Charles Vos, en es heer daan op bezeuk waor bij Charles, zaote zie deks zwiegzaom tegen euverein. 't Zwiege vaan Charles Vos waor neet mistruusteg, meh Vos had e groete opmèrkings-gave, en zeukde in eder detail gèt intrèssants. Erkinning veur De Bende vaan Suisse waor, tot de Gemeinte in 1925 gratis de linker veugel vaan de bove-verdeping vaan 't Ginneraolshoes besjikbaar stèlde veur activiteite vaan de Limburgse Kunskrink. De Museum-commissie perbeerde mèt de hölp vaan particulere, die hun kuns-werke in broeklien gaove, dao tentoen te stèlle. Daoneve organiseerde de Kunskrink tentoenstellinge vaan internationale gerenomeerde moderne kuns, meh ouch vaan awwe kuns. Evels vaan die planne is neet väöl vaan terech gekaome, meh d'r woort wel väöl tentoengestèld mèt werke vaan en 't door de eige leie. 't Museum bleef bestoon tot 't jaor 1943.
In de late Romeinse tied moot in Mestreech väöl wèrrek gewees zien veur alderlei artieste zoewie beeldhouwers, sjèlders, smeie, en pottemennekes. Jummers dee kleine nederzètting gelege aon de groete weeg vaan Boulogne-sur-Mer nao Keulen, voldeeg aon de vraog vaan artieste. Dee nederzètting waor 'n religieus centrum mèt tempels en preesters veur iere-deenste. D' r waor ouch 'n milletaere bezètting die daan weer alderlei handwèrreklui aontrok en genóg geld hadde um artieste te kinne betaole veur hun werk.'t Waore in Mestreech op d'n ierste plaots de eise vaan zoe'n ieredeenste die de artieste wèrek gaove. Dat kin me oonder aandere zien aon de restante vaan steine beelde die bij opgraovinge woorte gevónde oonder Hotel Derlon. Aon 't Vriethof heet me bij opgraovinge e veurbeeld vaan sjitterend broonswèrk gevónde. In 't Merovingische graafveld oppe Vriethof zien oondermie twie gouwe hengerkes en 'ne zèlvere mantelspang gevónde, bewèrek mèt gestileerde adelaars-motive en edelstein. Ouch 'nen iezere gespel mèt 'ne fiene decoratie vaan ingelag zèlever. Roond 't jaore 1100 woort in Mestreech väöl gebouwd en 't waor 'ne tied tot handwerklui vaan wied boete Mestreech, tot zellevers oet Lombardije, nao Mestreech kaome um mèt te hèlpe bouwe aon twie groete kèrke. Naomelek de Sint Servaos en de Slevrouwe kèrk. Partekelere lui waore toen vereinigd in 'ne broedersjap en zoe'n broedersjap waor 'n vereiniging die 'n eige altaar had in ein vaan de kèrke vaan de stad. Zie dege hun eige altaar oonderhawwe en perbeerde die daan zoe sjoen wie meugelek te make. Zie heurde daan Artieste in, die dèks oet aander steij kaome, um die altare daan mèt kuns dege opsere. Tösse 1450 en 1525 genoot Mestreech einige faom es centrum vaan artieste veural op 't gebeed vaan edelsmeed en geelgeters.(kopergeters). Ein vaan de bikindste Mestreechter geelgeters waor Aart van Tricht, dee leefde umstreeks 't jaor 1500. Heer heet de doupvónt gemaak, dee noe nog achter in de Slevrouwe kèrk steit. In 1490 kraog de Mestreechter goudsmeet Meister Ulrich 'nen opdrach vaan de kannunik vaan Servatius um e kosbaar gouwe dobbelkruus te make, dee bezat woort mèt pèrrel en edelstein. Mestreech heet ouch väöl artieste gekind die in 't boeteland miejer kóste verdene en daorum ouch weijer Europa in trokke. Sjèlder Coelers verhuisde nao Luik en nao 1815 vertrok teikenmeister Guillome Franquinet nao Paries, Londen en zellevers nao Noord Amerika. Theodore en Armand Schaepkens gónge in Brussel woene en beeldhouwer Matthias Kessels 1784-1836 góng in Rome woene en woort dao 'nen internationaal bekind artiest. Oondertösse beleefde Mestreech 'nen opkoms vaan de industrie en de dao-aon mèt verboonde eise. Charles Vos wèrkde twie jaor laank veur de Sphinx um dao oontwerpe te make vaan o.a. servies. Alexander Schaepkens leijde de Stads-teikensjaol en väöl Mestreechter artieste, glazeneers en diechters höbbe 'n deil vaan hun leve in de atteljees vaan eerdewerek en aander febrikke gewerk en 'ne bijdrage gelieverd aon us sjoen Mestreechter stad.
Charles Vos
Mathias Kemp
Alexander Schaepkens.
Henri Florimond Goovaerts
Edmond Bellefroid.
Pieke Dassen.
Phillipe van Gulpen.
Hotel kaffee De Suisse.
Artieste