Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Joseph Hollman
In Parijs storf Joseph Corneille Hubert Hollman op awwejaors-aovend in 't jaor 1926, eine door väöle ‘ne gelaowerde muzikant, gebore in Mestreech. Zien lètste wins waor um in zien geboorte stad Mestreech te weure begraove. In presentie vaan de Mastreechter Staar, de Keuninkleke Hermenie, de Capella Santi Servati en 't Mestreechs Stedelijk orkes, woort Joseph Hollman begraove in zien femilie graaf in Mestreech. Es ierbetoen aon Joseph Hollman woort op den ' ierste verdeping vaan zien geboortehoes, gelege in de Spilstraot nommer 4, ' nen inscriptie aongebrach ter naogedachtenis vaan Joseph Hollman. Heer woort dao gebore op 16 Oktober 1852 es Joseph, Corneille, Hubert  Hollman, zoon vaan Karel Lodewijk Hubert Hollman en Maria Elisabeth Hubertina Theodora Rutten. Oet de ech vaan Karel Lodewijk Hubert Hollman en Maria Elisabeth Hubertina Theodora Rutten woorte 10 kinder gebore. 1.Maria Josephina Hubertina Hollman, gebore op 24 Aprèl 1844, en is gestorreve op 24 December 1924. 2.Isabella Henrietta Hubertina Hollman, gebore op 20 Miert 1846, en is gestorreve op 7 Mei 1941 in Mestreech. 3.Ernest Toussaint Hubert Hollman, gebore op 1 November 1847, en is gestorreve op 16 Juni 1924. 4.Carolus Josephus Hubertus Hollman, gebore op 2 Oktober 1849, en is gestorreve op 27 Miert 1918. 5.Frederik Hubert Hollman, gebore op 25 Aprèl 1851 en is gestorreve op ? 6.Joseph Corneille Hubert Hollman, gebore op 16 Oktober 1852 en is gestorreve op 31 December 1926 in Paries. 7.Edmond Napoleon Hubert Hollman, gebore op 11 Miert 1854, en is gestorreve op 31 December 1913. 8.Alphons Marie Joseph Hubert Hollman, gebore op 18 September 1856, en is gestorreve op 27 Jannewarie 1857. 9.Clement Antoine Marie Hubert Hollman, gebore op 18 September 1856, en is gestorreve op 26 December 1856. Clement waor ‘ne twieling mèt Alphons. 10.Valerie Marie Josephine Hubertine Hollman, gebore op 18 Augustus 1858, en is gestorreve op 23 Juni 1897.
In de jaore daonao oontvóng Joseph Hollman väöl internationale oondersjeidinge en titels. Zoe woort heer Ridder in de Franse Orde vaan 't Legioen vaan Ier, Ridder in de Kroen vaan Mecklenburg-Strelitz en in Japan Offeceer in de Orde vaan de Rijzende Zon. In de jaore tachtig vaan de negetiende iew, is Hollman e tied laank solo-cellist vaan de Meiniger Hofkapelle gewees, 'nen ensemble dat in deen tied ein vaan de bèste orkeste waor vaan de wereld en stoont oonder leiing vaan Hans Büllow. In 't jaor 1887 góng heer weer trök nao Paries. Versjèllende composities zien aon Joseph Hollman opgedrage zoe  wie 't twiede cellokonzèr vaan Camile Saint Saens, " Le Cygne " oet 1902, is wel de bekinste. Meh Joseph componeerde ouch eige composities. Eine in 1912 aongelagde lies, steit tot heer heet gesjreve; drei Konzèrte veur vioolcel mèt orkès, eine Suite veur vioolcel mèt orkès, e paar Romances, eine Carmen-fantasie en versjèllende kleinere kamermeziek stökke. Meh 't mies bekinde stök is " Le Chant d'Amoer " veur sopraan, cello en piano. Ouch al woende heer in Paries zien geboorte stad Mestreech vergaot heer neet. Ummertouw  trejjde heer op in Mestreech, en späölde dao miestal zien levelings-compositie " Le Cygne " vaan Saint Saens ' nen  eige wèrk. Wie 't Mestreechs  Stedelijk Orkest op 20 Juli 1908  't 25 jaor zjubilei had, trooi Joseph Hollman op in de Dominicane-kerk en späölde dao 't Cellokonzèr vaan Joseph Haydn. In 1923 maakde Joseph Hollman op hoege leeftied nog 'ne konzèr-reis nao Japan en China. Heer woort gevraog um es meziek-lieraar veur ein vaan de zäöns vaan de Keizer vaan Japan te weure. Bij de Keizer vaan Japan leet heer zien Stradivarius es kedo achter. Aon bezit hechde heer naomelek wienig weerde, umtot heer allein mer veur de meziek leefde. Joseph Hollman storf op 31 December 1926 in Paries, meh woort in zien geboorte plaots Mestreech op de Algemeine Begraofplaot Tóngerseweeg begraove.
Amsterdam 1918.
Joseph Hollman  1910.
Ridder in de Franse Orde vaan 't Legioen vaan Ier.
Meiniger Hofkapelle.
Offeceer in de Orde vaan de Rijzende Zon.
Josef Hollman 1889.
Femilie-graaf Jopseph Hollman.
Conzèr 15 Aprèl 1896.
De awwers vaan Joseph hadde gedach tot heer ziene pa, es kaopmaan zouw goon opvolge. Meh al op jonge leeftied bleek tot heer bezunder muzikaol begaof waor. Vaan André Keller (1805-1870)  kraog heer zien ierste cello-lèsse. Wie heer veertien jaor waor sjikde ziene meziek-lieraar häöm nao 't conservatorium. Heer geit daan nao 't conservatorium vaan Brussel boe heer in 1870  aofstudeerde. Dao kraog heer cello-lès vaan Adrien Francois Servais (1807-1866). Daoneve kraog heer vaan F.Fétis compositie lèsse. In 1870 sloot Joseph zien studie aof mèt 'nen ierste pries. Nao ziene studie in Brussel vertrok heer nao Paries boe heer wijer góng studere bij Léon Jean Jaquard. Ziene andere liermeister weurt Karl Davidoff (1838-1889) in Sint Petersburg. Joseph Hollman geit weer nao zien studie's trök nao Paries en weurt daoneve  benump tot Hofmuzikant vaan Keuning Willem III. Zien ierste openbaar conzèr gaof heer in Paries in 1875 en dat waor e groet suksès. Heer is daan pas 23 jaor joonk. Daonao gaof heer nog väöl konzaer in gaans Europa en heer woort gereump um ziene magistrale techniek, ziene  weike meh temperamint-volle toengeving en, um ziene depe muzikaliteit. Keuning Willem III blijf häöm trouw volge en benumde häöm tot Offeceer in de Orde vaan den Eikekroen.
Josef Hollman 1915.
1852-1926.