Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Gek Netteke
Netteke, (Antoinette Pieters) is gebore op 15 Jannewarie 1891 op de Mestreechter Grachstraot es Jeannette Joséphine Simons. Zie waor ‘n dochter vaan de glaasblozer Joannes Baptista Simons en Elisabeth Kerstel. Op 15 Oktober 1913 trouwde Netteke mèt de ovewerker Willem Jozef Hubertus Pieters, zoon vaan de hoessjelder Joannes Hubertus Everardus Pieters en Anna Margaretha Mulkens. In 1956 woord  zie wedevrouw. Veertien jaor later, in 1970, is zie in Mestreech gestorreve. Mestreech en netuurlek ouch aander stei höbbe door de iewe ummertouw Vollek 's of stad's tiepe gehad, en ein vaan die figure vaan Mestreech waor Gek of Aajd Netteke. Häöre echte naom waor Antoinette Pieters mer ederein numde häör Gek Netteke umtot  'nen eder dee nao häör loerde de pókkel kraog vol gesjolle op 'ne meneer mèt wäörd dee menneg  Mestreechteneer neet mèchteg is. De jäög maakde daovaan hendeg gebruuk of beter gezag misbruuk vaan, door op häör te rope vaan; Hé gek Netteke !! En daan kaom dao weer 'ne waterval vaan lieleke wäörd oet häöre moond en..... de jäög had weer plezeer daovaan!!. Gek Netteke waor 'ne vaste klant vaan kaffee de Trubinal en In De Oude Vogelstruis, en op ‘t teras vaan kaffee Hotel Woolwich, boe zie ziech in 'n heukske de neer zat en daan e dröpke (eelske) of e glaas beer droonk. Zie zaot dao daan gèt in häör eige te moompele en roukde daobij  'ne groete dikke sigaar. Es 't sjoen weer waor zaot zie ummertouw boete op 'n benkske oppe Vriethof en voorde dao de doeve. Zie waor 'nen echte bieste vrund. Meh es iemend gèt lang naor häör loerde kraog heer of zie de volle laog, en bleef zie sjelle tot ze doorlepe. Ouch bezeukde zie dèks Hotel Woolwich, vreuger gelege op de hook vaan 't Vriethof en de Staotenstraot. Zie zat ziech dao op 't terras um gèt te drinke, en raokde netuurlek ‘n sigaar. Zie waor dao  zoegezag 'ne vaste klant. Ederein in Mestreech kós gek Netteke, en de mieste kóste dao mèt lache es Netteke weer sjellenterend langs leep. Meh op ‘nen daag góng ‘t bekans mis mèt häör. Netteke zaot in de zomer vaan 1968 s`aovends laat op ‘n terras e sigeerke te raoke, wie ‘ne maan langs kaom en gèt tege häör zag. Dat veel neet in gooj eerde en Netteke begós dee maan, Henricus Lambertus. C. vaan beroop hoessjelder oet Mestreech, de pókkel vol te sjelle, en ‘t góng zoe hèl tege ein op tot heer Netteke bij häör stroot pakde en häör bekaans kitsjde. Heer kós Netteke wel en mós beter wete, meh heer had ouch gèt de deep in ‘t gleeske geloerd. Evels ‘ne govie en de hospes vaan de kaffee hadde ‘t veurval gezeen, en zie kóste nog optied ingriepe. Henricus C. woort gearrèsteerd en opgebrach nao ‘t pelitsie-buro. Op 14 Jannewarie 1969 kao de zaak veur en de twie getuige verklaorde aon de rechter gezeen te höbbe tot de verdachte häör bij de keel had gegrepe. De verdachte eiges verklaorde ziech niks mie te kinne rappelere vaan ‘t veurval, en verklaorde aon de Rechter zaat gewees te zien deen aovend. De verdachte had e draankprobleem en waor zjus twie weke veur ‘t veurval vrij gekaome oet de gevaangenis. De rechter zag tot ‘t ummertouw um d’n draank góng bij de verdachte. Heer nump zien lot in eige han zag de Offeceer, en veroordeilde Henricus Lambertus. C. tot ‘n gevaangenis straf vaan zès maond mèt aoftrek, en ‘n oonverwaardeleke terbesjikkingstèlling vaan de Regering.Op 'ne daag kaom zie evels 'ne Hollender tege dee häör neet kös en ouch neet goot kós verstoon, en dat leep slechter aof. Ouch heer kraog ze geveeg vaan Netteke. Dao op volgde gèt duie en trèkke en Netteke houwde mèt häör kalbèske op häöm in. Zie veel op de groond en is later deen daag gestorreve op 't hospitaol vaan Annadal.
                                                ‘t Verhäöl gesjreve door René Heckers. Kint geer häöm nog ? Bruudsje Stols ? De maan vaan de bóngbóngs in de Hoonderstraot ? Bruudsje Stols, 'nen echte Mestreechteneer, mèt 't hart op de gooj plaots. Ederen daag kaom gek Nètteke langs. Ze kraog daan vaan Bruudsje 'n lekker tas koffie. Ze had liever e dröpke gehad, ze droonk altied 'n eelske. Meh Bruudsje waor neet te verleie. Veur e dröpke mós ze mer örges aanders goon. E paar daog veur Keersemes góng Nètteke häöre AOW aofhole op 't Poskentoer. En mèt de cent in häör hand (ze had geine portmenee) góng ze de straot op. 'nen Oonierleke mins had häör mèt e smoesje de lange gaank vaan de Sintervaoskèrk ingelok en had häör häöre gansen AOW aofgenome. Krietentere kaom ze de Hoonderstraot ingeloupe. Bruudsje Stols stoont touwvalleg aon de deur en vroog häör wat gebäörd waor. Jenkentere vertèlde ze wat häör waor euverkoume. Bruudsje waor raozeteg en gaof häör alvas e paar tiensjes um de ierste daog door te koume. 'Gaank 't noe aongeve bij de pelisie en daan kumpste mèt de Keersdaog mer hei ete', belaofde heer häör. En heer heel woord. Heer had de ganse winkel verseerd en midde in de zaak had heer 'ne groete keersboum neergezat mèt allemaol keersballe en lempkes. Heer had get lekkers laote veerdeg make door Jean Labrouche, eine vaan de beter koks in Mestreech. En smikkele en smölle mer mèt hunnen twieje. Wie heer zaog wie gelökkeg tot Nètteke waor, lepe bij Bruudsje Stols de traone euver zien wange. Ziene Keersmes kós neet mie kepot en dee vaan Nètteke al gaar neet. Dee gawdeef aon de kèrk höbbe ze gekrege, meh de cent waore op. Via e paar vrun vaan Bruudsje Stols is dat mèt die cent vaan Nètteke ouch nog good gekoume. Mèt häör depe rimpels en gries haor en geleefde han, kin me dinke tot zie väöl heet mèt gemaak in häör leve.                                                                                                                                                                                                                        
Antoinette Pieters.
Café Hotel Woolwich. Vreuger Café Hotel de La Poste.
Trouw 14-01-1969.
De Tijd.14-01-1969.
Antoinette Pieters.
1891-1970.