Al  iewe laank tèlde me in zien range, vaan 'ne streek, stad of wiek 'ne Volleksfiguur of wie me ouch zeet e Volleks-tiepe. Zoe'n figuur had miestal e gèt aofwiekend fysiek, eigenaordeg gedrag of wie me ouch zeet, e raar geweente. Me zeet ouch wel vaan " dee of zie sprong e bitsje boete 't rijjke " !!  Mesjiens bestoon zie vendaog nog wel hei of dao, meh of zie oets 't zellefde kleur-rieke stare-dom bereike es wie vreuger, is nog mer de vraog dee me ziech kin stèlle. Daoveur is uzze tied gèt te zier gepollies gewore. Me kin aon 't woord Vollek miejer beteikenisse geve of boe zoe wie  e gróp lui vaan kin aonduijde. De naom vaan Vollek kin me ouch es, 'nen  aontal bewoeners vaan e land of gebeed , lui of meinigte vaan 'ne liegere klasse, klante in 'ne winkel, wèrk vollek of 'ne gróp lui. Boe woorte die Volleks figure gebore , en wie waor hunne werkeleke naom ? Vaan väöl figure zal me dat noets mie weite ! Zie zien dao of waore dao en lepe door de straote vaan e wiek of stad en wisselde oets 't tijdelike veur 't iewege !! Meh 'nen aontal bijnaome vaan die Volksfigure circulere nog altied in 't collectieve geheuge vaan meinig Mestreechteneer. Dink mer ins aon Roei Tina, Lang Lies, de Drei Sjoenste, de Piele Hameleers, Rieka, De Sjerel, Puck d'n Doder,Sjarel mèt zien tropöt, en nog väöl mie vaan die Volksfigure. Vaan Roei Tina en Berb de Lotsch weite veer tot zie de hoor späölde in de Stokstraot, in de jaore 40 en 50 ,veur de renovatie vaan dee straot en wiek. Ten tijje vaan de twiede wereld-oorlog, en ouch daonao, hadde zie väöl klandiesie vaan Soldaote,Duitse en gèt later ouch vaan Amerikaanse. Bei 't begin vaan de renovatie woort 't werk-terein verplaots naor 't Stads-park. Dèks kaomde in de winter de meitskes,  haaf bevrore, um ziech eve  gèt te wèrme of te drinke in kaffee Paco, gelege aon de Graon-mèrret. In Blauw Dörp dao woende de Sjerel, 'ne maan dee de ganse daag roond leep mèt e kajee en potloed. Heer sjreef gediechte en verhäölselkes euver alderlei lui of oonderwerpe .Heer zaot dèks in 't Stads-park op e bènkske bij de bieste te diechte en te sjrieve.Ouch e gleeske of fleske beer späölde 'ne belaankrieke rol in zien leve,bij 't zeuke nao insperatie veur zien gediechte. D'n draank waor ouch veur "Sjarel mèt zien tropöt" e groete ambras. Sjarel waor ne maan dee altied gooi zin had meh de lui in de binne stad vaan Mestreech,mèt zien tropöt groete sjrik aonjaogde. Heer fietsde of leep door de Groete Staat en versjrikde de lui door achter iemes te goon stoon en daan hèl op zien trompöt te bloze. Heer kós mer ein toen bloze, meh dat waor genóg um die lui de stuupe op 't lief te jaoge !! D'r waor mer eine maan boe heer naor luusterde en dat waor de Börgemeister !! Op aandere paasj kint geer vaan gèt miejer vaan die bekinde Mestreechter Volleks figure leze.