| |
| Winand Nicolaas Clermont woort gebore in 1802 en greujde op
in 'ne tied tot Mestreech den ' ierste stappe maakde tot 'ne groete
industrialisatie. Heer trouwde in 1829 mèt Adèle Elisabeth
Chainaye. Iers wèrkde heer same mèt Petrus Regout en hadde zie in 1842
same e geweer febrik. Ouch zaote zie same in 'ne kemissie vaan spoorwege ,
um 't bestudere vaan 'ne spoorbaon aon te lègke tösse Mestreech en Aoke. Wijer had Clermont
same mèt N.A.Bosch in deen tied 'ne zaajt en zeip-febrik in Wiek. Vaanaof
1843 zaot heer in de Gemeinteraod vaan Mestreech en in 1851 woort heer
gekoze tot Wethouwer. 't Sukses vaan de febrikke vaan Petrus Regout waore aonleiding
veur Clermont um zellevers 'nen eerdewèrk-febrik in Wiek te beginne. Heer
vroog same mèt zien sjoenbroor Chris Chainaye in 1850 'ne
vergunning aon um 'nen eerdewerk febrik te vestige, neve zien
zaajt en zeip-febrik in Wiek-Mestreech . |
Dee vergunning woort häöm op 4 November
door de Gedeputeerde Staote verliend. 't Eerdewerk febrik woort nog
binne de vestigingwerreke gebouwd en 'nen oondergroondse gaank (poterne)
zörgde veur den 'aonvoer vaan groondstoffe en den 'aofvoer vaan de
produkte. 't Bedrief góng in 1850 mèt tien wèrklui vaan start meh
had al in 1852 mie es hoonderd lui in deens. 't Febrik had genóg vaklui in
deens en de mieste kaome vaan 't febrik vaan Petrus Regout die dao weg
gekoch woorte. Petrus Regout perbeerde dat tege te hawwe door de
werklui contracte te laote teikene zoetot zie neet bij 'nen aandere
eerderwerk-febrik gónge werke. 't Aontal werklui greujde in 1855 tot 245,meh
e jaor later waor dat nog mer 185 werklui.'t Bedrief had las vaan de
crisis in 1857 en de jaore daonao stagneerde de verkoup en woort de
financiële positie aongetas. In 't jaor 1859 had me 'n aontal Belzje
financiers gevoonde um in 't bedrief te investere. De oondernumming woort
noe in 'ne commanditaire vennootsjap umgezat. De naom vaan 't febrik woort
noe: Société pour la fabrication des faïnces fines et produits
céramiques de toute espèce,sous la raison sociale Guillaume,Lambert et
Compagnie. De start vaan de nuie vennootsjap waor good en me verkoch
väöl eerdewerk nao Nederlands-Indië. Me plaotste in 't febrik e nui stoom-mesjien,
meh me had nog väöl awwe veurraode vaan slechte kwalliteit eerdewerk en me mos die
veur wieneg geld verkaope. |
Victor Jaunez, Directeur-Gérant en lid
vaan de Raod vaan Bestuur vaan de
Société Céramique.(1895)
|
 |
't Febrik waor verawwerd en me had väöl sjöld
en me waor bang tot ze pleite zow goon. In 'ne boetegewoene vergadering vaan
de aondeilhawwers woort in 1863 beslote tot umzètting in 'ne
naomloze Vennootsjap. De NV Société Céramique. Winant Clermont naom
oontslaag en benaderde A.Jaunez same mèt ziene zoon Victor oet Metz, um
de leiding vaan 't febrik euver te numme. De situatie die de hiere Jaunez
aontroffe waor neet um nao hoes te sjrieve en de ierste jaore stoont in 't
teike vaan ,reparere,oetbreiding en vernuiing. Ouch woort de werktied vaan
'ne werkmaan vasgestèld tot 11 oor per daag in de zomer en 10.30 oor in
de winter. Aw mesjienes woorte vernuit en me koch in Ingeland twie nui peerse veur de
eerdbereiding. In 1867 koch me boete de vesting land op umtot
de vestingsmör gedeiltelek woorte aufgebroke. |
|
De
Céramique. |
|
Merk-Stempel
Céramique
|
Mèt de verliechting sjakelde me vaan olie en
petrolium euver op gaas en me bouwde e febrik um bakstein te make veur
eige gebruuk en bouwde mör um 't febrik die d'r noe nog altied stoon.
Meh 't góng nog altied neet zoe good mèt 't febrik umtot zie nog altied
mèt verluus drejde. De aondeilhawwers H.de Meeûs,B.Dewandre,Ch.Gillot en
E.de Haussy liende e bedraag vaan 260.000 francs aon 't febrik en zoe
woort e faliesemint veurkaome. In 1872 trooj Winand Clermont es lid vaan
de raod vaan bestuur auf, umtot zien gezoondheid slech waor.
Lankzaam góng 't beter en vaanaof 1880 greujde 't febrik oet tot 'ne
krachtige oondernumming. 't Aontal werklui steeg in 1866 tot 229, in
1871 tot 325 en tot 764 werklui in 1887.Mèt de touwneumende
produktie maakde me noe wel groete winste en in 't jaor 1891 melde me gruuts tot
zie geine sjöld mie hadde bij de baank. In 1907 woort 't febrik weer oetgebreid en me bouwede 'ne nuie |
't Bereumde
Braobands-Boont.
|
|
|
|
| tunnelove op gaas . In 1910 góng me
euver op èllektrik en woorte hoonderd nuie èlletrikke moters geplaots.
Vlak veur d'n ierste wereld-oorlog woort 'ne nuie divisie geplaots, veur sanitair eerdewerk de zoegenaomde division II. Toen woort
ouch
de bekinde Wiebengahal gebouwd en waor gemaak vaan gewapend beton dat in
deen tied nui waor in de bouw. Bij 't oetbreke vaan den' ierste
wereld-oorlog raakde de Céramique in de probleme umtot de touwveur vaan
China klei stopde. Nao de bevrijing in 1945, steeg de vraog weer nao
servies en sanitair en had me gelök tot 't febrik mèt d'n oorlog gein
sjaoj had gelijje. In 1956 woort de naom veranderd in Céramique
Maastricht NV en woorte twie nui ovens in gebruuk genome um aon de
stijgende vraog nao sanitair te voldoen. |
|
D'n Wiebengahal.
|
't Euverlègk in 1958 mèt de
plaotseleke concurrent De Sphinx kaom daan ouch veur väöl lui oet de
loch valle meh eve later waor de fusie e fiet. De directeure Graof C.A. de
Meeûs-d'Argenteuil en K. van Hindeloopen-Labberton woorte in de directie
vaan de nuie NV Sphinx-Céramique opgenome. Heimèt kaom 'n einde aon 't
ruim hoonderd jaor bestoon vaan de Société Céramique, 'ne Belzje
oondernumming op Hollands groondgebeed. |
|
