| |
Pieter Lodewijk
Joseph Geijsen woort gebore in 1929 en waor vaan beroop kunsjèlder, meh
ouch e groet levens geneter . Oonder de naom vaan Joseph Geijsen kint geine
mins häöm, meh bereump en gèt slech aongesjreve waor heer oonder ziene
sjuilnaom vaan Roeje Pierre. De sjrik vaan 't Quartier Latin vaan Mestreech
!! Vervlook meh ouch geleef in 'nen aontal kaffee's vaan Mestreech.
Heer waor e vaste klant bij kaffee " De Trubinal " en kaffee van
Sloun .Ouch bij kaffee 't Knijpke kaom heer dèks en holp soms gèt mèt
um leeg glazer op te hole en aander liech wèrk zoetot heer af en tow e
gleeske beer kraog vaan de hospes dee e bitsje kompassie mèt häöm
had . Meh heer zaot miejer veur d'n toog daan d'r achter zoetot heer zien
gleeske beer en zien dröpke kós drinke. Ouch staok heer ziech 'ne dikke
sigaar op en kós genete vaan de lui um häöm heen. |
| De zaogs häöm al vaan wiet aof kaome aon waggele umtot
heer neet mie zoe good kós laope of te deep in 't gleeske had gekeke.
Heer had ummertouw e wit kostuum aon (es 'r nog zuver waor) boe tege
ziene roeje baart fèl aofstook en ....de kós 'm ouch e bitsje ruke.
Meh heer waor neet koedaordeg en geine mins had las vaan häöm. Meh de hospes
had soms miejer meuite mèt häöm, umtot heer es 'r gèt te väöl had
gedrónke in slaop veel of te lang zoonder gèt te drinke bleef
zitte. Aon 't eind vaan zien carrière waor heer nog mer in twie kaffee's
welkom en kraog dao neet miejer es ach glazer beer. Meh dat waore in
twie kaffee's zestien en e paar dröpkes genóg um weer sjeigelenterend
nao hoes te goon . Zien kostuums woorte dèks gereinigd mèt hölep vaan 'ne
kastelijn dee d'r veur zörgde tot zie nao de stomerij , De Lelie of Phalte woorte gebrach , zoetot heer weer veur e paar daog propel d'r oet
zaog. Ederein kós häöm en aon 'n gratis runsje dao had heer gein klaoge
aon. ' Ne jonge klaore en 'ne groete sigaar en 'n wit kostuum dat waor zien
kinmèrk .Väöl lui gaove häöm ouch de bijnaom vaan " De Kardinaal
" of "Bissjop". Heer heet indrök gemaak umtot heer de medische wetensjap veur
gek heet gezat en ...umtot heer op zien meneer vaan leve, nog zoelang heet kinne leve. |
Roeje Pierre
|
|
 |
|
|
|
|
