Rob Graafland is gebore in Mestreech op 26 November 1875 en euverlije in Heerle op 28 Aprèl  1940. Ziene Pa Joonkhier, Joan Graafland,waor eigeneer vaan ‘ne baank meh ouch ‘ne heraldicus ,dee twie geïllestreerde bookwèrke publiceerde naomelek “ Linburgsche Wapens” en ” Encyclopédie Héraldique “ die waore gesjreve in ’t Frans en in ’t Hollands. Ouch maakde heer brandgesjèlderde houte waope-teleure mèt brandstif en kleure. In ’t jaor 1890 verhuisde de femilie Graafland vaan Mestreech nao Amsterdam boe Rob Graafland tegeliekertied de Rieksnormaal-sjaol veur teikenoonderwijzers en de Quellinussjaol doorleep. In ’t jaor 1895 leet heer ziech insjrieve aon de Rijksacademie veur Beeldende kunste in Amsterdam. Dao waore zien liermeisters August Allebé en Carel Dake. Nao ziene studie kierde Rob Graafland in 1898 trök nao Mestreech en woort teikenlieraar aon ’t Stads-Teikeninstituut. Heer had dao twie bekinde collega’s naomelek Frans van der Laar en Willem Sprenger. In die daog waor in Mestreech wieneg of gein cultureel leve. Rob Graafland doceerde neet allein sjèlderskuns meh ouch meziek en literatuur. De gebreurs Mathias en Pierre Kemp die ouch lès kraoge vaan Rob Graafland, raakde daodoor mèt de kleingediechte vaan Guido Gezelle bekind en hadde ‘ne groete invlood op hun latere literaire oontwikkeling. Rob Graafland herkinde väöl talent in sommege lierlinge en daorum riegde heer in 1902 ‘ne Zoondags-Sjaol  op. Decoratieve Kunste um die talente dao-in beter en gratis te kinne oonderweize. Lierlinge vaan die Zoondags-Sjaol waore oonder aandere Edmond Bellefroid,Jan Grégoire,Charles Hollman,Han Jelinger en Henri Jonas. In de winter sjèlderde Rob Graafland en zien lierlinge in de Augustiene kerk en in de zomer trokke zie de natuur in um “En Plein  Air “ te sjèldere.Vaanaof 1911 sjèlderde zie in de Italiaanse tuin vaan Graafland, gelege op Sint Pieter. In ’t jaor 1911 trouwde Rob Graafland met Maria Duquesne en de houweleks reis gong nao Italië. Zie kraoge in 1903 ‘ne dochter,Suzanne en in 1906 woort ‘ne zoon, Charles, gebore. In dat zelfde jaor vertrok Rob Graafland allein veur ‘ne studie-reis nao Amerika ,en bleef dao ’nen aontal maonde woene. Wie heer weer trök waor in Mestreech kraog heer financiële probleme en mos heer zien eiges oontworpe hoes, gelege aon de Sjanerweeg,verkaope. Rob Graafland verhuisde toen mèt zien femilie nao Belzj, iers nao Luik meh daonao nao Wandre, gèt korter bij Mestreech.Heer bleef gewoen lès geve aon ’t Stadsteikeninstituut en aon de Zoondags-sjaol.  In 1911 verhuisde heer weer nao Sint Pieter en zien hoes woort ‘ne plaots boe kunsteneers oet Mestreech ziech tege koumde. In deen periood braok de glorie-tied vaan Rob Graafland aon. Waor heer begós, met Rembrandt achtige steil te sjèldere, meh noe waor heer oetgegreujd tot ‘ne romantische impressionist. Zien wèrreke riechde ziech op de sjoenegheid vaan ’t leve.Väöl vaan zien awwere deuk rampeneerde heer. In 1910 riechde heer, in kaffee Suisse oppe Vriethof, same met Jan Bakhoven,Guillaume Eberhard,Herman Gouwe,Henri Jonas,J.van der Kooy,Jos Narinx en Nic Reinders de Limburgse Kunskringk op. D’n ierste groete tentoenstèlling waor in Miert 1910 in de Dominicaner kerk. In 1912 kraog heer de Broonze Iere medaaje vaan de stad Amsterdam veur zien creatie “Lezend Meisje “ en in 1916 kraog heer vaan Keunigin Wilhelmina ‘ne gouwe medaaje. Rob Graafland had in deen tied zien hoegtepunt bereik , meh opins kaom aon alles ‘nen einde.Heer woort depresief en dat woort ummertouw erger en erger. In 1933 woort heer iers in Apeldoorn en daonao in Vught in ‘ne hospitaol opgenome.Es gevolg vaan ‘ne daod vaan eiges agressie verloor heer zien rechter oug. Merkweerdeg verdween de depressie in 1934 en begós, naotot de femilie nao Vught verhuisde, heer weer te sjèldere. Meh Rob Graafland waor neet mie dezelfde Graafland es veur zien krenkde, en lag ziech touw op portretsjèldere. In 1938 verhuisde heer nao Den Haag meh ’t jaor daonao verhuisde heer weer trök nao Vught. In 1940 kraog Rob Graafland ‘ne koedaordege krènkde en heer verzwaakde in korte tied snel. Rob Graafland woort in ’t hospitaol vaan Heerle opgenome boe heer op 28 Aprèl 1940 is euverlije.