| |
In de jaore vlak veur d'n twiede wereldoorlog kaom Rika
Cesarin same mèt häöre maan en drei kinder nao Mestreech um hei e nui
bestoon op te bouwe. Zie bookde 'n kemerke in Hotel De Zwaan gelege
in de Stokstraot. 't Waor neet gemekelek in deen tied um werk te vinde
umtot gans Europa in 'ne depe crisis zaot zoe vlak veur d'n twiede
wereld-oorlog. D'r waor gein werk en 't waor lèstig um te euverleve en te
zörrege veur de drei kinder. Häöre maan Gino ,waor 'ne
klusjesmaan dee van alles deeg um mer gèt cent mèt nao hoes te bringe.
Zien eigelek beroop waor 't legke vaan mozaiek vloere, meh dao waor in
Mestreech in deen tied neet väöl aon te verdene en gein vraog nao. Zie
mooste nao aander dinger goon zeuke um geld te verdene . Zoe góng Rika
de straote op en kaffee's aof um zeute of gezaajte pinda's te verkoupe. |
| Op Vriedag verkoch zie hieringe aon de deur en in de
kaffee's umtot de katelieke vreuger gein vleis aote op vriedag.
Nao e jaor op 't Hotel kemerke te höbbe gewoend verhuisde de Femilie
Cesarin nao 'n hoes in de Stokstraot op nommer 37. Jaore later opende zie 'ne
frituur en 'nen ies salon "Milano" gelege aon de Tóngersestraot.
Wee kin ziech neet rappelere de beleidigende opmèrkinge vaan Rika es 'ne
maan mèt 'ne baard of knievel de Frituur binne kaom !! Heer kraog 'm daan
d'r euver tot 'r ziech fetsounlik mós sjere!! Zie kraog 't veerdeg um die
manslui neet te helpe en zie kraoge daan gein friet of ies vaan häör. Zie en
häör femilie höbbe altied hel mote wèrke um gèt te kinne verdene. Rika
Sesarin huurt zoonder twiefel thoes in 't rijjke vaan bekinde Mestreechter
Volleks tiepe |
Rika Cesarin
|
|
Keuningin Beatrix
|
Zie heet 't tot 'ne bijrol gebrach vaan 'ne film vaan "Commessaris
Fanfaron en de Poesjenellen Moord" vaan Math van Even (1981) . Dee film
is noe weer op DVD oetgebrach. Meh zie is veural bekind gewore veur häör
groete verafgoding vaan us Keunigshoes. Es eine vaan 't Keunings hoes
Mestreech bezeukde daan stong zie es ierste langs de kant vaan de weeg um
'n hand te sjödde aon de Keuningin of ein vaan de Keuninklike
femilie. Ouch wie de Paus kaom, stóng zie ore vaan te veure te wachte um
häöm te zien of aon te rake. Zie kaom daodoor ouch dèks op de tellevisie. |
| Häör Frietuur - Iessalon hóng daan ouch hiele maol vol
mèt foto's vaan 't Keuningklik hoes en de Paus. Ouch stökke oet de
gezèt hónge aon de moer en me mós 't mer neet perbere gèt slech
euver de Keunigin of de Paus te zègke, umtot 'ste daan nao boete
kós goon zoonder friet of ies. !! |
|
