| |
Vastelaovend besteit oet drei
pijlers naomelek de plaotseleke cultuur , 't sezoen, en de religie. Dat
zien de drei pijlers beveur veer mote wake tot die mèt de Vastelaovend
neet weure aongetas, veranderd en of verlore mage goon. Dat is 'ne stèlling
dee John Hoenen, carnavaloog, musicoloog, en sjrijver us mèt wèlt geve
bij 't viere vaan de Vastelaovend. John Hoenen woort gebore op 18 Miert
1939 in de Platielstraot nommer 24, zjus neve 't hoes vaan de Piele Hameleers. Wie heer
twintig jaor joonk waor studeerde heer aon de mezieksjaol veur
meziek-lieraar en dirizjent en heer kaom toen op 't idee um mèt de Vastelaovend
gèt muzikaol te oondernumme. De Oude Vogelstruis laog bij häöm um de
hook en dao woort 't idee gebore um same mèt e paar vrun e Hermenieke op
te riechte en mèt dat Hermenieke de Vastelaovends daog in te duke. Heer
kós vaan de mezieksjaol e paar instreminte liene veur zien vrun, meh de mieste kóste nog gein solfège leze. Heer sjreef e
paar leedsjes in 't ein,twie en drei sjrif zoetot die toch e bitsje
mèt kóste speule. |
| Ziene vreund André de Jong waor 'ne gooje muzikant en
späölde op 'ne saxofoon en John op 'ne trompöt en waore same 't trèkpeerd vaan 't Hermenieke. André en John heelde de maot en de res
perbeerde zoe good wie meugelek mèt te speule. Um gèt cent te bespaore
woort 'ne kinderkouts mèt flesse beer mèt genome um de doors tijdens de
cortège gèt te lèsse en dee in deen tied behuurlek laank waor. 't Waor in
deen tied neet de geweente um beer mèt in de cortège te numme en mèt e
fles euver straot te laope. Wie me zaog tot dao e paar muzikante mèt
flesse beer aonkaomde waor al snel de naom vaan 't Zaat Hermenieke gebore.
's Aovends had iemes 'ne keerbeurstel mèt 'ne dweil vaan thoes genome en
dat waor 't ierste veendel vaan 't Hermenieke. Umtot me spraok vaan 't
Zaat Hermenieke waor dat ouch de naom dee me later op e sjèld sjèlderde.
't Zaat Hermenieke of den' ierste Zaate Herremenie waor gebore. |
John Hoenen
|
| Zie hadde väöl sukses en achter 't Hermenieke leep e
struip lui die daan ouch mèt de kaffees in gónge en 't Zaat Hermenieke
hoofde daodoor dèks neet te betaole. Leep me vreuger iers achter 'nen
accordeonspeuler en eine mèt e trömmelke noe waor 't fenomeen gebore
vaan 'n Zaate Herremenie boe 't speule,'t samezien en 't plezeer 'ne
groete drijfveer is. 't Hermenieke greujde mèt de jaore en d'r
woorte miejer Zaate Hermeniekes opgeriech. Bekinde Hermeniekes vaan 't
ierste oor waore Fanfaar Ut Rommedoeke , 't Zaat
Herremenieke , Herremenie Zoonder Naom , Vreug en Neugter, Hèl en Váls
, Gein Meziek en Toch Pries , La Kapella Solo Mio , en Noets Toes .In
deen tied góng me nog neet nao 'ne kaffee meh |
 |
góng me nao 'ne kastelein zoe wie dee vaan Willem Smeets 'ne
bekinde en legendarische kastelein vaan de kaffee Au Mouton Blanc.Me kós
ziech dao ouch insjrieve veur de Vastelaovends cortège's .'t Waore de
jaore zestig en de winkels waore nog gewoen op maondag en dinsdag ope, meh
dao kaom verandering in. Wie in 1973 't ierste Zaate Hermeniekes concours
woort georganiseerd lepe zeve Hermeniekes door de stad en gónge winkels
in en oet. |
|
| 't Waor e groet sukses en nao e paar jaor waore 't aontal
Hermeniekes oetgegreujd tot tientalle Zaate Hermeniekes en waor 't verstèndeger um de winkels mer te slete. De Vastelaovend had e nuie
impuls gekrege en 't woort ummertow dröker en dröker .'t Waor de
redding vaan de Vastelaovend en de Hermeniekes zien noe neet mie weg
te dinke mèt de Vastelaovend. |
|
